Eron Isroilning Dimona va Arad shaharlariga raketa zarbalari berdi

21-mart kuni kechqurun Eron tomonidan Isroilning Dimona va Arad shaharlariga raketa zarbalari berildi. Hujumlar oqibatida 100 dan ortiq kishi tan jarohati olgan. Bu haqda Al Jazeera nashri xabar berdi.

 

Eron davlat televideniyesi ushbu zarbalarni Natanzdagi uranni boyitish bo‘yicha yadroviy majmuaga qilingan hujumga javob sifatida talqin qilgan.

Ma’lumotlarga ko‘ra, har ikkala shaharda ham mudofaa tizimi ayrim raketalarni tutib qola olmagan.

 

Arad shahrida raketaning to‘g‘ridan-to‘g‘ri tushishi natijasida to‘qqizta turar joy binosi vayron bo‘lgan va shahar markaziga jiddiy zarar yetgan. Isroil favqulodda xizmatlari ma’lumotiga ko‘ra, shaharda kamida 88 kishi jarohatlangan, ulardan 10 nafari og‘ir ahvolda. Og‘ir yaradorlar orasida besh yoshli qizaloq ham bor.

 

Dimona shahrida esa 12 tagacha zarba qayd etilgani aytilmoqda. Ulardan biri turar joy binosiga kelib tushgan va natijada 50 dan ortiq kishi yaralangan. Rasmiylar hozircha ikki shaharda ham halok bo‘lganlar haqida ma’lumot bermagan.

 

Isroillik harbiy jurnalist Sergey Auslenderning ta’kidlashicha, vayronagarchiliklar va jarohatlanganlar sonining ko‘pligiga qaramay, qurbonlar bo‘lmagani “deyarli mo‘jiza” hisoblanadi. U, shuningdek, ayrim tutib oluvchi raketalar nishonni yo‘q qilolmaganini ham qayd etgan.

 

Isroil bosh vaziri Binyamin Netanyaxu hujumlarga munosabat bildirar ekan, bu oqshom Isroil uchun “og‘ir kecha” bo‘lganini aytib, Eronga qarshi zarbalar davom etishini ma’lum qilgan.

 

Shu bilan birga, MAGATE agentligi Dimonadagi Shimon Peres nomidagi yadroviy tadqiqot markaziga zarar yetgani haqida ma’lumot olmaganini hamda hududda radiatsiya darajasi oshgani qayd etilmaganini bildirgan.