Tramp Eronga Hormuz bo'g'ozini ochish uchun 48 soat vaqt berdi
22 davlat Hormuz bo‘g‘ozida kemalar xavfsizligini ta’minlash tashabbusini qo‘llab-quvvatlashga tayyor.
AQSh prezidenti Donald Tramp Eronni Hormuz bo‘g‘ozini ochishga chaqirib, Tehronga 48 soatlik ultimatum qo‘yganini ma’lum qildi.
Prezidentning ta’kidlashicha, agar bo‘g‘oz ushbu muddat ichida to‘liq ochilmasa, AQSh Eronning energetika infratuzilmasiga, jumladan elektr stansiyalariga zarbalar berishni boshlashi mumkin. Uning so‘zlariga ko‘ra, birinchi navbatda mamlakatdagi eng yirik energetika inshootlaridan biri nishonga olinadi.
Donald Tramp bu bayonotni o‘zining Truth Social ijtimoiy tarmog‘idagi sahifasida e’lon qilgan.
Shuningdek, Israel Katz avvalroq IDF hamda AQSh harbiylari yaqin vaqt ichida Eronga qarshi zarbalarni kuchaytirish ehtimoli borligini bildirgan edi.
Bundan oldin 22 ta davlat rasmiylari Hormuz bo‘g‘ozi orqali kemalarning xavfsiz harakatlanishini ta’minlash bo‘yicha xalqaro sa’y-harakatlarni qo‘llab-quvvatlashga tayyor ekanini ma’lum qilgan. Ular Eronning qo‘shni davlatlarga qaratilgan hujumlarini qoralab, zarardan jabr ko‘rgan mamlakatlarga moliyaviy yordam ko‘rsatishga ham tayyor ekanliklarini bildirgan.
Shu bilan birga, NBC News xabariga ko‘ra, Oq uy ma’muriyati Hormuz hududida kemalar xavfsizligini ta’minlash maqsadida Eron portlarini nazoratga olish hamda Fors ko‘rfazidagi ayrim kichik orollarga qo‘shin joylashtirish ehtimolini ham muhokama qilmoqda.
