Amir Temur xiyoboni hududi vaqtincha yopiladi
Shuningdek, xiyobonga olib chiquvchi metro bekatlarining chiqish yo‘llari ham vaqtincha yopiladi.
Toshkent shahrining Yunusobod tumanida obodonlashtirish ishlari olib borilishi munosabati bilan 23-martdan 7-aprel kuniga qadar (shu kuni ham) Amir Temur xiyoboni hududi butun perimetri bo‘ylab vaqtincha yopiladi. Bu haqda Toshkent shahar hokimligi matbuot xizmati xabar berdi.
Ma’lum qilinishicha, ushbu cheklovlar faqat xiyobon hududiga va uni chegaralovchi Maxtumquli, Istiqbol, Sayilgoh ko‘chalari hamda Amir Temur va Mustaqillik shohko‘chalaridagi maydonga taalluqlidir.
Poytaxt hokimligi obodonlashtirish ishlari davomida piyodalar yo‘laklari ta’mirlanadi va qisman yangilanadi, hududdagi muhandislik kommunikatsiyalari va sug‘orish tizimi modernizatsiya qilinishini bildirgan.
Shu bilan birga, hokimlik xiyobon hududi ko‘kalamzorlashtiriladi, ko‘chatlar ekilishini, yangilanayotgan sug‘orish tizimi mavjud yashil maydonlarni samarali sug‘orishni ta’minlaydi va suvdan oqilona foydalanishni yo‘lga qo‘yilishini qo‘shimcha qilgan.
Xabarga ko‘ra, olib borilayotgan ishlar davomida birorta ham mavjud daraxtga zarar yetkazilmaydi. Avtotransport harakati tutash ko‘chalarda odatdagi tartibda davom etadi, yo‘l bo‘yida to‘xtab turish imkoniyati saqlanadi.
Shuningdek, xiyobonga olib chiquvchi metro bekatlari chiqish yo‘llari vaqtincha yopiladi.
