BAA havo hududining yopilishi yana bir haftaga uzaytirildi
Cheklovlar tranzit reyslarga ham ta’sir ko‘rsatmoqda.
Birlashgan Arab Amirliklari mamlakat ustidagi havo hududining qisman yopilishini yana yetti kunga uzaytirish to‘g‘risida qaror qabul qildi. Bu haqda TASS Yaqin Sharqdagi havo harakatini boshqarish tizimidagi manbalarga tayanib xabar berdi.
Ma’lum qilinishicha, joriy etilgan cheklovlar 2026-yil 30-mart kuni UTC bo‘yicha soat 12:00 gacha amal qiladi. Qaror mintaqada davom etayotgan harbiy keskinlik, xususan AQSh va Isroil tomonidan Eronga qarshi boshlagan harbiy operatsiyalar fonida qabul qilingan.
Avvalroq Rossiya Transport vazirligi ham Yaqin Sharqdagi bir qator davlatlar havo hududi parvozlar uchun yopiq qolayotganini ma’lum qilgan edi.
Ushbu ro‘yxatga Isroil, Eron, Iroq, Bahrayn, Qatar, Quvayt, Oman, BAA, Saudiya Arabistoni va Suriya kiritilgan.
Cheklovlar tranzit reyslarga ham ta’sir ko‘rsatmoqda. Aviakompaniyalar xavfli deb hisoblangan hududlarni chetlab o‘tish uchun parvoz yo‘nalishlarini o‘zgartirishga majbur bo‘lmoqda.
Shuningdek, ekipajlarga havo harakatini boshqarish xizmatlaridan keladigan barcha operativ bildirishnomalarni diqqat bilan kuzatib borish tavsiya etilgan.
