Isroillik ko‘chmanchilar G‘arbiy sohilda falastinliklarga hujum qilib, uylariga o‘t qo‘ydi
Hujumlar 18 yoshli isroillik ko‘chmanchining halok bo‘lishi ortidan boshlangan.
Egallab olingan G‘arbiy Sohilda ekstremist yahudiy ko‘chmanchilar falastin qishloqlarida bir qator hujumlar uyushtirib, uylar, transport vositalari va qishloq xo‘jaligi maydonlariga o‘t qo‘ydi. Bu haqda BBC xabar berdi.
Egallab olingan G‘arbiy Sohilda ekstremist yahudiy ko‘chmanchilar falastinliklar yashaydigan qishloqlarida bir qator hujumlar uyushtirib, uylar, transport vositalari va qishloq xo‘jaligi maydonlariga o‘t qo‘ydi. Bu haqda BBC xabar berdi.
Ma’lum qilinishicha, hujumlar shanba kuni 18 yoshli ko‘chmanchi Yehuda Shermanning avtohalokatda vafot etishidan so‘ng amalga oshirilgan.
Mahalliy manbalarga ko‘ra, Shermanni kvadrosiklda harakatlanayotgan paytda falastinlik haydovchi boshqaruvidagi avtomobil urib ketgan. Politsiya hodisaning qasddanmi yoki tasodifan sodir bo‘lganini tekshirmoqda.
Javoban, ko‘chmanchilar WhatsApp guruhlari orqali “qasos kampaniyasi”ni boshlagan. Isroil OAVi kecha davomida 20 dan ortiq hujumlar ro‘yxatga olinganini bildirgan.
Falastin Tashqi ishlar vazirligi hujumni qoralab, harakat uylar va mulkni yondirish, tinch aholini qo‘rqitish va o‘ldirish, Ramazon hayiti patida muhim yo‘llar va chorrahalarni nishonga olishni o‘z ichiga olganini bildirdi.
Shanba kuni kechasi Jalud, Qaryut, al-Funduqmiya va Silat al-Dhah qishloqlari hujumga uchradi. Onlayn videolarda, niqobli qora kiyimdagi shaxslarning qishloqlarga kirayotgani, bir nechta avtomobillar yonib turgani va binolar oynalari sindirilgani ko‘rinadi. Bir fotosuratda “Yehuda uchun qasos” so‘zlari yozilgan.
Falastin Qizil Yarim Oy jamiyatining ma’lum qilishicha, Jaludda hujumchilar bilan to‘qnash kelgan kamida uch falastinlik bosh jarohati olib, kasalxonaga yetkazilgan, shuningdek, ba’zi hujum qilganlar ham jarohat olgan.
Isroil politsiyasi Deir al-Hatab qishlog‘i yaqinida besh kishini hibsga olganini, Itamar ko‘chmanchi punktida xavfsizlik kuchlariga hujum qilgan bir politsiya xodimi jarohatlanganini bildirgan. Politsiya “ekstremist zo‘ravon shaxslarga nisbatan murosasiz ishlashini” ta’kidladi.
Yesh Din, Falastinlik huquqlarini himoya qiluvchi Isroil fuqarolik tashkiloti, hujumlarni “qirg‘in kechasi” deb atab, harbiylarning bunday vaziyatga yetarli tayyorgarlik ko‘rmaganini tanqid qilgan.
Isroilning markaziy chap Demokratlar partiyasi yetakchisi Yair Golan so‘nggi ko‘chmanchi hujumlarini qoraladi va hukumatni buning sodir bo‘lishiga yo‘l qo‘yganlikda aybladi.
BMT ma’lumotlariga ko‘ra, yil boshidan beri Isroil ko‘chmanchilari 7 nafar, Isroil kuchlari esa 18 nafar falastinlikni o‘ldirgan, shulardan 15 ta o‘lim Eron bilan urush boshlangandan keyin sodir bo‘lgan.
Isroil G‘arbiy Sohil va Sharqiy Quddusni 1967-yilda egallab, taxminan 160 ko‘chmanchi punktini qurdi va ular 700,000 yahudiyni qamrab oladi. Shu hududlarda 3,3 million falastinlik yashaydi. Xalqaro huquqqa ko‘ra, bu punktlar noqonuniy hisoblanadi.
“Yakshanba oqshomida yahudiy ko‘chmanchilar yo‘llarni to‘sib, norozilik bildirdi va ba’zi qishloqlarda yana to‘planib, Nablus shimoli-g‘arbida avtomobil yuvish punktini yondirgani haqida xabarlar bor”, deyiladi xabarda.
