Janubiy Koreyadagi yirik yong‘inda o‘zbekistonliklar jabrlanmagani ma’lum qilindi
Hozirda vaziyat O‘zbekiston TIV tomonidan nazoratga olingan.
Daejeon shahridagi avtomobil ehtiyot qismlari ishlab chiqariladigan zavodda yuz bergan yirik yong‘in oqibatida halok bo‘lganlar yoki jarohatlanganlar orasida O‘zbekiston fuqarolari yo‘qligi ma’lum qilindi. Bu haqda Tashqi ishlar vazirligi xabar berdi.
Ma’lum qilinishicha, yong‘in 20-mart kuni sodir bo‘lgan. Tabiiy ofat ko‘lami juda katta bo‘lgani sababli Janubiy Koreya Milliy yong‘in xizmati agentligi tomonidan milliy safarbarlik buyrug‘i e’lon qilingan. Ushbu choralar odatda hududiy resurslar yong‘inni bartaraf etish va qutqaruv ishlarini olib borish uchun yetarli bo‘lmaganda qo‘llanadi.
Hozirda vaziyat O‘zbekiston TIV Konsullik-huquqiy departamenti tomonidan doimiy nazoratga olingan. Shuningdek, Koreyadagi O‘zbekiston diplomatik vakolatxonasi orqali tegishli mahalliy idoralar bilan yaqin hamkorlikda ishlar olib borilmoqda.
Zarurat tug‘ilgan taqdirda, fuqarolar O‘zbekiston elchixonasiga favqulodda telefon raqamlari yoki elektron pochta manzillari orqali murojaat qilishlari mumkin.
