Joriy yilning oktabridan Toshkent va atrofida yangi issiqxonalar tashkil etish cheklanadi
“Yashil makon” loyihasi doirasida 2030-yilgacha 28 ta botanika va dendrologiya bog‘i tashkil etiladi.
2026-yil 1-oktabrdan Toshkent shahri va unga tutash hududlarda yangi issiqxonalar tashkil etish cheklanishi eʼlon qilindi. Bu qaror ekologik barqarorlikni taʼminlash, havoning ifloslanishini kamaytirish va energiya samaradorligini oshirish maqsadida qabul qilindi.
Prezident Shavkat Mirziyoyevga taqdim etilgan loyiha taqdimotida Toshkent shahridagi havoning ifloslanish darajasi belgilangan meʼyordan yuqori ekanligi qayd etildi. Havo ifloslanishining asosiy omillari sifatida sanoatning o‘sishi, transport vositalari sonining ortishi, uglerod yoqilg‘ilaridan keng foydalanish va tabiiy omillar hamda nazorat yetarli emasligi ko‘rsatildi. Toshkent hududidagi issiqxonalar orasida ko‘mir, mazut va nostandart yoqilg‘idan foydalanuvchi xo‘jaliklar ulushi yuqori bo‘lib, chiqarayotgan NO₂, SO₂ va PM2,5 kabi zararli moddalar havoning sifatiga sezilarli taʼsir ko‘rsatmoqda.
Shuning uchun yangi issiqxonalarni energiya tejamkor va tabiiy-iqlim sharoiti qulay bo‘lgan hududlarga bosqichma-bosqich ko‘chirish taklif etildi. Xususan, Surxondaryo viloyatining Sherobod tumanida kamida 940 gektar maydonda agropark tashkil etish rejalashtirilgan. Bu hududda quyosh nurlanishi yuqori, qish nisbatan yumshoq, isitish xarajatlari past bo‘lib, mahsulot tannarxini sezilarli darajada kamaytirishga imkon beradi.
Ko‘chiriladigan issiqxonalar uchun infratuzilma, kredit va logistika bo‘yicha qulayliklar yaratiladi. Shu bilan birga, “Yashil makon” loyihasi doirasida botanika va dendrologiya bog‘lari tashkil etilishi rejalashtirilgan. Hozirgi vaqtda mamlakatda 3 ta botanika bog‘i mavjud bo‘lsa, loyiha doirasida yana 12 ta botanika va 16 ta dendrologiya bog‘i tashkil etiladi. Har bir hududda tuproq-iqlim sharoitiga mos daraxt va butalar tanlanadi.
2030-yilgacha Qoraqalpog‘iston Respublikasi va barcha viloyatlar hamda Toshkent shahrida maydoni 100 gektardan kam bo‘lmagan botanika va dendrologiya bog‘lari yaratilishi ko‘zda tutilgan. Natijada mamlakatda umumiy yashillik darajasi 14,2 foizdan 30 foizgacha oshiriladi, PM2,5 va PM10 konsentratsiyasi 20-25 foizga kamayadi, iqlimi og‘ir hududlarda o‘rtacha havo harorati 1,5–2 darajaga pasayishi kutilmoqda.
Prezident Shavkat Mirziyoyev loyiha ekologik barqarorlikni taʼminlashda muhim ekanini qayd etib, uni maʼqulladi.
