Kim Chen In yana Shimoliy Koreya prezidenti etib saylandi

Kim Chen In mamlakatning Oliy Xalq Assambleyasining birinchi sessiyasida prezident lavozimiga qayta tayinlandi. Bu haqda Reuters Shimoliy Koreya davlat nashri KCNA'ga tayanib xabar bermoqda.

 

Kim 1948-yilda bobosi Kim Ir Sen tomonidan asos solingan davlatning uchinchi avlod hukmdori bo‘lib, otasi 2011-yilda vafot etganidan beri mamlakatni boshqarib kelmoqda.

 

Qayd etilishicha, Pxenyandagi yig‘ilishda sotsialistik konstitutsiyaga o‘zgartirishlar va qo‘shimchalar, shuningdek, Davlat Ishlari Komissiyasi raisi va boshqa davlat rahbarligi organlarini saylash masalalari ko‘rib chiqildi. Assambleya shuningdek, fevral oyida bo‘lib o‘tgan IX partiya kongressida e’lon qilingan besh yillik iqtisodiy rejani ham muhokama qilgan.

 

“Diqqat markazida esa, Pxenyan Janubiy Koreyaga nisbatan Kim Chen Inning “ikki dushman davlat” siyosatini rasmiylashtirish uchun konstitutsiyani o‘zgartiradimi degan savol turibdi. So‘nggi yillarda yetakchi Shimoliy Koreyaning uzoq yillik tinch birlashish maqsadini chetga surib, Janubiy Koreyani dushman davlat sifatida qayta e’lon qildi”, deb yozmoqda agentlik.

 

Yirik siyosiy shaxs, Kim Chen Inning singlisi, Kim Yo Chen esa,  Davlat Ishlari Komissiyasi a’zolari orasida ko‘rsatilmagan. Janubiy Koreya Birlashuv Vazirligi bu o‘zgarish sababini o‘rganayotganini bildirsa-da, ekspertlar bu uning ta’sir kuchi kamayganini bildirmasligini ta’kidlashmoqda. 

 

Kyungnam Universiteti professori Lim Eul-chulning fikricha, uning ro‘yxatdan yo‘qligi maqomining pasayganini emas, balki strategik rol taqsimotini ko‘rsatadi.

 

Ushbu yig‘ilish Shimoliy Koreya yetakchiligida siyosiy va iqtisodiy yo‘nalishlarni belgilashda muhim voqea sifatida baholanmoqda.