Nyu-Yorkdagi La-Guardia aeroporti Air Canada samolyoti o‘t o‘chirish mashinasiga urilgani sabab yopildi

Montrealdan kelayotgan Air Canada Express 8646-reys samolyoti Nyu-Yorkdagi La-Guardia aeroportiga qo‘nayotganda yer usti transport vositasiga urildi va bu aeroportning yopilishiga sabab bo‘ldi, deb xabar bermoqda Al Jazeera.

 

Nyu-York politsiyasi AFP agentligiga dushanba kuni samolyot “port ma’muriyati transport vositasiga urildi” deb ma’lum qilgan. 

 

Reuters'ga ko‘ra, hodisa natijasida 4 kishi jabrlangan. Samolyotning uchuvchilari jiddiy jarohat olgan. o‘t o‘chirish mashinasidagi serjant va politsiya xodimining suyaklari singan, ammo ularning holati barqaror. Samolyotda 72 yo‘lovchi va 4 ekipaj a’zosi bo‘lgan, hozircha yo‘lovchilar orasida jiddiy jarohat olganlar haqida ma’lumot berilmagan.

 

Flightradar24 xabar berishicha, CRJ‑900 samolyoti yakshanba kechasi taxminan 24 mph (39 km/soat) tezlik bilan transport vositasiga urilgan. Samolyot Air Canada ning mintaqaviy hamkori Jazz Aviation tomonidan boshqarilgan.

 

AQSh Federal Aviatsiya Administratsiyasi (FAA) samolyot favqulodda holati sababli La-Guardia aeroportiga barcha reyslarni to‘xtatganini e’lon qildi. FAA bayonotida aeroport yopilishi favqulodda holat bilan bog‘liq ekanligi aytilgan, ammo qo‘shimcha tafsilotlar berilmagan.

 

Ijtimoiy tarmoqlarda tarqalgan videolavhalarda samolyot burnining yuqoriga egilgan holda shikastlanganini ko‘rish mumkin.

 

Shuningdek, La-Guardia aeroportining rasmiy saytida aeroportga kelayotgan samolyotlar boshqa aeroportlarga yo‘naltirilgani yoki chiqish nuqtasiga qaytarilgani ko‘rsatilgan. 

 

Nyu-York shahrining favqulodda vaziyatlar boshqarmasi aholiga aeroport yaqinida yo‘l yopilishlari, transport kechikishlari bo‘lishi mumkinligidan ogohlantirdi.