O‘zbekistonliklar AQSHda mavsumiy qishloq xo‘jaligi ishlariga jalb etiladi
O‘rtacha oylik miqdori 3500 dollarni tashkil qiladi.
O‘zbekiston Migratsiya agentligi rahbari Behzod Musayev AQSHning USA Farm Labor tashkiloti rahbari Manuyel Fik bilan onlayn uchrashuv o‘tkazdi. Bu haqda Migratsiya agentligi xabar berdi.
Ma’lum qilinishicha, uchrashuvda o‘zbekistonlik nomzodlarni AQSHdagi mavsumiy qishloq xo‘jaligi ishlariga ilk bor jalb etish mexanizmlari muhokama qilindi. Muloqot davomida ish muddati 9–10 oy, oylik esa o‘rtacha 3 500 dollar bo‘lishi, turar joy ish beruvchi tomonidan ta’minlanishi hamda malakali mutaxassislar ustuvorlikka ega ekani belgilandi.
Uchrashuv yakunida tomonlar hamkorlik bo‘yicha dastlabki kelishuvga erishdi va keyingi bosqichlarni eng tez muddatlarda amalga oshirishga kelishib olindi.
Ma’lumotlarga ko‘ra, USA Farm Labor 22-yildan buyon H-2A dasturi doirasida AQSHda mavsumiy qishloq xo‘jaligi ishlariga xorijiy ishchilarni jalb qiladi va hozirda 1 400 dan ortiq fermer xo‘jaliklari va rancholar bilan hamkorlik qiladi.
