Qashqadaryoda hokim yordamchisi va shahar hokimligi yetakchi mutaxassisi pora bilan ushlandi
Ular ijara shartnomasi asosida berilgan davlat zaxirasidagi yerni xususiy mulk sifatida rasmiylashtirib berish uchun pul olgan.
Qarshi shahridagi mahalla fuqarolar yig‘inida hokim yordamchisi va shahar hokimligi yetakchi mutaxassisi pora bilan qo‘lga olindi. Bu haqda DXX xabar berdi.
Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari tomonidan olib borilgan tekshiruvda ma’lum bo‘lishicha, hokim yordamchisi 1983-yilda tug‘ilgan fuqaroga 2019-yilda ijara shartnomasi asosida berilgan davlat zaxirasidagi 35 sotix yer maydonini o‘z tanishlari orqali xususiy mulk sifatida rasmiylashtirib berish uchun 1000 AQSH dollari olgan.
Tadbir davomida hokim yordamchisi ushbu pulni shahar hokimligi yetakchi mutaxassisiga berish kerakligi aniqlanib, u ham olgan vaqtda ushlandi.
Hozirda qonunbuzarlarga nisbatan jinoyat ishi qo‘zg‘atilgan va tergov harakatlari olib borilmoqda.
