Sirdaryoda 2 nafar MIB xodimi qo‘lga olindi
Ular qarzdor fuqarodan ijro ishini tugatish evaziga pul olgan va undiruvchi fuqaroni aldagan.
Sirdaryo viloyatida Majburiy ijro byurosi (MIB) Mirzaobod tuman bo‘limi 2 nafar davlat ijrochisi noqonuniy harakatlari uchun ushlandi. Bu haqda Zamon.uz'ga DXX xabar berdi.
Ma’lum qilinishicha, fuqarolik ishlari bo‘yicha Guliston tumanlararo sudining 2021-yil dekabr oyidagi ijro varaqasiga asosan, qarzdor shaxsdan undiruvchi fuqaro foydasiga 30 mln so‘m miqdorida moddiy va ma’naviy zarar undirish belgilangan bo‘lib, u mazkur davlat ijrochilaridan birining ish yurituvida bo‘lgan.
Davlat ijrochilari qarzdor fuqarodan ijro ishini tugatish evaziga 20 mln so‘m olib, undiruvchi fuqaroga go‘yoki qarzdor og‘ir sharoitda ekanligini ro‘kach qilib, pulning 14 mln so‘m qismini berishgan hamda undan 30 mln so‘m olganligi va da’vosi yo‘qligi to‘g‘risida tilxat yozdirib olgan.
So‘ngra ular qolgan 6 mln so‘mni tuman prokuraturasi binosi oldida o‘zaro 3 mln so‘mdan taqsimlab olgan vaqtlarida ashyoviy dalillar bilan qo‘lga olingan.
Holat yuzasidan Sirdaryo viloyat prokuraturasi tomonidan mazkur MIB davlat ijrochilariga nisbatan jinoyat ishi qo‘zg‘atilib, “qamoq” ehtiyot chorasi qo‘llanildi.
