Toshkent viloyatining tog‘li hududlariga yangi mikroavtobus yo‘nalishlari yo‘lga qo‘yildi
Yo‘l haqi 10 ming so‘m etib belgilangan bo‘lib, qatnovlar har kuni soat 6:00 dan boshlanadi.
21-martdan boshlab Toshkent viloyatining mashhur tog‘li hududlariga olib boruvchi yangi 324- va 325-sonli mikroavtobus yo‘nalishlari ishga tushirildi. Bu haqda “Toshshahartransxizmat” xabar berdi.
Qayd etilishicha, mazkur yo‘nalishlar Chinorkent, Chimyon hamda Amirsoy kabi sayyohlik maskanlariga borishni sezilarli darajada osonlashtiradi. Yangi qatnovlar nafaqat hudud aholisi, balki mahalliy va xorijiy sayyohlar uchun ham qulay transport imkoniyatini yaratadi.
324-sonli yo‘nalish Chinorkent temir yo‘l bekatidan boshlanib, Chimyon orqali Qoranqul, Pana mehmonxonasi, Amirsoy, Tibet, Beldersoy, Sevarsoy, Layner, Piramida va Bochka manzillari orqali harakatlanadi. 325-sonli yo‘nalish esa ushbu yo‘nalish bo‘ylab teskari tartibda qatnovni amalga oshiradi.
Yo‘nalishlarda 16 o‘rinli, konditsioner bilan jihozlangan zamonaviy Ford mikroavtobuslari xizmat ko‘rsatadi. Yo‘l haqi 10 ming so‘m etib belgilangan bo‘lib, to‘lovni naqd pul yoki bank kartasi orqali amalga oshirish mumkin.
Qatnovlar har kuni soat 06:00 dan boshlab yo‘lga qo‘yilgan bo‘lib, mikroavtobuslar har 15 daqiqada harakatlanadi. Manzilgacha yetib borish vaqti o‘rtacha 40 daqiqani tashkil etadi.
