Toshkentdagi Mingbuloq ko‘chasining bir qismi yopiladi
24-martdan 31-martga qadar Mirzo Ulug‘bek tumanidagi Mingbuloq va Shukur Burxonov ko‘chalarida yer osti kabel tarmoqlarini tortish ishlari olib boriladi.
Elektr ta’minotini yaxshilash maqsadida 24-martdan 31-martga qadar Mirzo Ulug‘bek tumanidagi Mingbuloq va Shukur Burxonov ko‘chalarida yer osti kabel tarmoqlarini tortish ishlari olib boriladi. Bu haqda Mirzo Ulug‘bek tumani hokimligi matbuot xizmati xabar berdi.
Shu munosabat bilan Mingbuloq ko‘chasining Xamroyeva ko‘chasidan kirish qismi vaqtincha yopiladi. Avtoulovlar yo‘lning ikkinchi bo‘lagidan qarama-qarshi yo‘nalishda harakatlanadi.
Shuningdek, Do‘rmon yo‘li ko‘chasidan Mingbuloq ko‘chasiga harakat qilish mumkin bo‘ladi. Mingbuloq ko‘chasidan Shukur Burxonov ko‘chasiga harakat vaqtincha cheklanadi.
