Tramp Eron bilan besh kunlik sulh e'lon qildi
AQSh prezidenti davom etayotgan muzokaralar yuzasidan Eron obyektlariga zarbalarni vaqtincha cheklashni buyurdi, Tehron esa AQSh bilan muzokaralar o‘tkazilayotganini inkor qildi.
Donald Tramp AQSh Mudofaa vazirligiga Eron energetika infratuzilmasiga rejalashtirilgan havo zarbalarini besh kunga to‘xtatish bo‘yicha ko‘rsatma berdi.
Uning ma’lum qilishicha, so‘nggi kunlarda AQSh va Eron o‘rtasida Yaqin Sharqdagi vaziyatni tinch yo‘l bilan hal etish masalasida “samarali va konstruktiv” muzokaralar o‘tkazilgan. Shu sababli Eron elektr stansiyalari hamda energetika obyektlariga zarba berish vaqtincha kechiktirilgan.
Trampning ta’kidlashicha, ushbu muzokaralar hafta davomida davom etadi. Muzokaralarning borishi ijobiy yakunlansa, tomonlar o‘rtasidagi keskinlikni kamaytirish bo‘yicha kengroq kelishuvga erishilishi mumkin.
Biroq Tehron rasmiylari bunday muzokaralar o‘tkazilayotganini inkor etgan. Mas’ud Pezeshkian AQSh prezidenti bayonotlariga munosabat bildirib, Tashqi ishlar vazirligining pozitsiyasini keltirdi: unga ko‘ra, Tehron va AQSh o‘rtasida hech qanday muzokaralar olib borilmayapti.
Eron tomoni Trampning bayonotlari asosan energetika bozoridagi narxlarni pasaytirish va AQShning harbiy rejalarini amalga oshirish uchun vaqt yutishga qaratilgan bo‘lishi mumkinligini bildirgan.
Avvalroq Tramp Hormuz bo‘g‘ozi masalasida Tehronga ultimatum qo‘yib, agar bo‘g‘oz 48 soat ichida ochilmasa, Eron elektr stansiyalariga zarba berilishi mumkinligini aytgandi.
