Turkiya, Misr va Pokiston Eron-AQSh mojarosida vositachilik qilmoqda
Uch mamlakat AQSh elchisi Stiv Vitkoff va Eron tashqi ishlar vaziri Abbos Aroqchi bilan alohida muzokaralar o‘tkazgan.
Axios nashri manbasiga tayanib xabar berishicha, Turkiya, Misr va Pokiston AQSh, Isroil va Eron o‘rtasidagi mojaro jarayonida vositachilik qilmoqda. So‘nggi kunlarda uch mamlakat tomonlarga xabar almashish va muzokaralarda yordam berib, jarayonni osonlashtirishga harakat qilmoqda.
Manbaning so‘zlariga ko‘ra, uch mamlakat AQSh elchisi Stiv Vitkoff va Eron tashqi ishlar vaziri Abbos Aroqchi bilan alohida muzokaralar o‘tkazgan. Vositachilik jarayoni davom etmoqda va allaqachon ma’lum yutuqlarga erishilgan.
AQSh prezidenti Donald Tramp Fox Business intervyusida Eron bilan keyingi besh kun ichida kelishuvga erishishni maqsad qilganini ma’lum qilgan. U o‘zi AQSh harbiylariga ushbu vaqt davomida Eron energetika infratuzilmasiga zarbalarni to‘xtatishni buyurganini ham qo‘shimcha qilgan.
Axios manbasi ta’kidlaganidek, vositachilikning asosiy maqsadi — urushni to‘xtatish va hal qilinmagan barcha masalalarni siyosiy yo‘l bilan hal qilishdir.
