Turkiyaning Hatay viloyati delegatsiyasi Urganch shahriga bordi
Hatay viloyati aholisi Shavkat Mirziyoyevning taklifiga binoan O‘zbekistonga tashrif buyurgan.
O‘zbekistonda tashrif bilan bo‘lib turgan Turkiyaning Hatay viloyati vakillari Urganch davlat pedagogika institutidagi Navro‘z tantanalarida ishtirok etadilar. Bu haqda O‘zbekiston Turizm qo‘mitasi xabar berdi.
Ma’lum qilinishicha, Turkiya vakillari bugun Urganch xalqaro aeroportida kutib olingan.
“Mehmonlar Urganch davlat pedagogika institutidagi Navro‘z tantanalarida ishtirok etadilar. Kunning ikkinchi yarmida “Arda Xiva” xalqaro turizm majmuasi va Ichan-Qal’aning tarixiy obidalarini tomosha qiladilar”, deyiladi xabarda.
O‘zbekiston Respublikasi Prezidenti Shavkat Mirziyoyev joriy yil yanvar oyida Turkiyaga rasmiy tashrifi chog‘ida Hatay viloyatining Arsuz tumanida “O‘zbekiston” turar-joy majmuasining ochilish marosimida turkiyalik qardoshlarni, xususan, Hatay aholisi vakillarini yurtimizga sayohat va Navro‘z bayramiga taklif etgan edi.
Ushbu tashabbus doirasida mehmonlar uchun Andijon–Samarqand–Xiva yo‘nalishi bo‘ylab 5 kunlik sayohat dasturi tashkil etilgan.
