Aholi 2025-yilda xorijiy valyutaning 41 foizini onlayn tarzda ayirboshlagan — Markaziy bank
Bu ko‘rsatkich 2024-yilga nisbatan 8,1 milliard dollarga oshgan.
2025-yilda O‘zbekistonda aholi va tijorat banklari o‘rtasida jami 33,6 milliard dollar ekvivalentida xorijiy valyuta oldi-sotdi operatsiyalari amalga oshirildi. Bu haqda Markaziy bank ma’lum qildi.
Bu ko‘rsatkich 2024-yilga nisbatan 8,1 milliard dollarga yoki 32 foizga oshgan.
Tahlilga ko‘ra, o‘tgan yili banklar jismoniy shaxslardan 21,6 milliard dollar miqdorida xorijiy valyuta xarid qilgan bo‘lib, bu yil davomida 34 foizlik o‘sishni ko‘rsatgan. Shu bilan birga, aholiga 12 milliard dollar miqdorida valyuta sotilgan (o‘sish — 27 foiz).
Valyuta ayirboshlash operatsiyalarining asosiy qismi an’anaviy shoxobchalar orqali amalga oshirilgan — 19,3 milliard dollar yoki jami hajmning 57 foizi.
Masofaviy xizmatlar orqali amalga oshirilgan operatsiyalar 13,8 milliard dollarni tashkil etib, ulushi 41 foizga yetgan va bu yo‘nalishda 43 foizlik o‘sish qayd etilgan. Qolgan 574 million dollar esa 24/7 rejimda ishlovchi bankomatlar orqali ayirboshlangan.
Markaziy bank qayd etishicha, onlayn xizmatlar va tun-u kun faoliyat yurituvchi valyuta bankomatlari orqali operatsiyalar ulushi izchil ortib bormoqda. Bu esa aholining raqamli bank xizmatlaridan foydalanish darajasi kengayayotganini ko‘rsatadi.
Shuningdek, banklar tomonidan jismoniy shaxslardan sotib olingan xorijiy valyuta hajmi ularga sotilgan valyutaga nisbatan 9,7 milliard dollarga ko‘p bo‘lgan. Bu holat ichki valyuta bozorida qo‘shimcha taklif shakllanishiga xizmat qilib, valyuta muvozanatini ta’minlashda muhim omil sifatida baholanmoqda.
