AQSh Eron bilan urushni 9-aprelgacha tugatmoqchi — OAV
Muzokaralar yaqin kunlarda Pokistonda davom etishi kutilmoqda.
Ynet portali xabariga ko‘ra, AQSh Eron bilan davom etayotgan mojaroni 9-aprelga qadar yakunlashni rejalashtirmoqda. Nashr ma’lumotiga ko‘ra, bu haqda ismi oshkor etilmagan isroillik rasmiy ma’lum qilgan.
Manbaga ko‘ra, Donald Tramp boshchiligidagi Vashington mojaroni tugatish uchun aynan 9-aprel sanasini maqsadli muddat sifatida belgilagan. Shu sababli hozirgi bosqichda harbiy harakatlar va diplomatik muzokaralar uchun taxminan uch hafta vaqt qolayotgani qayd etilgan.
Shuningdek, rasmiy manba AQSh va Eron o‘rtasidagi navbatdagi muzokaralar shu hafta oxirida Pokiston hududida o‘tkazilishi kutilayotganini bildirgan.
Ta’kidlanishicha, mojaroni 9-aprelgacha yakunlash Donald Trampga Isroilning Mustaqillik kuni tadbirlarida ishtirok etish va davlat mukofotini qabul qilish uchun mamlakatga tashrif buyurish imkonini berishi mumkin.
Avvalroq Tramp so‘nggi kunlarda Eron vakillari bilan muzokaralar o‘tkazilganini ma’lum qilib, AQSh harbiylariga Eronning energetika infratuzilmasiga zarbalarni vaqtincha to‘xtatish bo‘yicha topshiriq berganini bildirgan edi.
