Kim Chen In Janubiy Koreyani rasman dushman davlat deb e’lon qildi
Seul bilan har qanday siyosiy yoki diplomatik hamkorlik qat’iyan man etiladi.
Shimoliy Koreya rahbari Kim Chen In Shimoliy Koreyaning 15-chaqiriq Oliy Xalq Assambleyasi birinchi sessiyasida so‘zlagan nutqida Janubiy Koreyani rasman dushman davlat sifatida e’lon qildi. Bu haqda Koreya Markaziy axborot agentligi (KCNA) xabar berdi.
Uning ta’kidlashicha, Pxenyan Seulni “eng dushman davlat” sifatida ko‘radi va unga nisbatan har qanday siyosiy yoki diplomatik hamkorlikni qat’iyan rad etadi.
“Biz, ayniqsa, Janubiy Koreyani eng dushman davlat sifatida ko‘rib chiqamiz va uni eng aniq so‘zlar hamda amaliy harakatlar bilan qat’iyan rad etamiz va e’tiborsiz qoldiramiz”, — dedi Kim Chen In.
Shimoliy Koreya yetakchisi, shuningdek, agar Janubiy Koreya tomonidan Pxenyanga qarshi har qanday tajovuz sodir etilsa, bunga keskin va shafqatsiz javob berilishini ta’kidladi.
Uning so‘zlariga ko‘ra, Koreya yarimorolida ikki davlat o‘rtasidagi munosabatlar amalda yakunlangan va Pxenyan bundan buyon Seul bilan aloqalarni tiklashni ko‘rib chiqmaydi. Kim Chen In ikki davlat alohida siyosiy tizimga ega mustaqil davlatlar sifatida qaralishini ham qayd etdi.
Avvalroq Shimoliy Koreya yetakchisi Seul bilan barcha aloqalarni to‘liq rad etishini bildirgan edi. Uning fikricha, ikki davlat o‘rtasidagi munosabatlar “orqaga qaytmas nuqta”dan o‘tib ketgan.
Ayni paytda Janubiy Koreya rahbariyati Shimoliy Koreya bilan keskinlikni kamaytirish va muloqotni qayta tiklash tarafdori ekanini bildirgan. Biroq Pxenyan Seulning bunday tashabbuslariga keskin tanqid bilan javob bergan.
