Kolumbiyada harbiy samolyot halokatga uchradi

Dushanba kuni Kolumbiyada harbiy samolyot parvozga ko‘tarilish vaqtida halokatga uchrab, 66 kishi vafot etdi. Bu haqda rasmiylarga tayanib Reuters xabar bermoqda.

 

Ma’lum qilinishicha, qutqaruvchilar o‘nlab omon qolganlarni yaqin atrofdagi shifoxonalarga yetkazib, hali ham bedarak yo‘qolgan to‘rt kishini qidirmoqda.

 

Kolumbiya Qurolli kuchlari rahbari Hyugo Alexandro Lopezga ko‘ra, Lockheed Martin tomonidan ishlab chiqarilgan Hercules C-130 transport samolyotida jami 128 kishi bo‘lgan. Ularning 11 nafari Harbiy-havo kuchlari a’zolari, 115 nafari quruqlik qo‘shinlari harbiylari va ikki nafari milliy politsiya xodimlari bo‘lgan. 

 

Qurbonlar soni dastlab e’lon qilingan ko‘rsatkichdan deyarli ikki barobar ko‘p bo‘ldi. Ayni paytda voqea joyida qidiruv va qutqaruv ishlari davom etmoqda.

 

Kolumbiya mudofaa vaziri Pedro Sanchezning ma’lum qilishicha, hodisa samolyot Puerto Leguizamo shahridan, Peru bilan chegarada joylashgan hududdan parvozga ko‘tarilayotgan paytda yuz bergan.

 

Yong‘in xavfsizligi xodimi Eduardo San Xuan Kallexas samolyot uchish-qo‘nish yo‘lagining oxiriga yaqin joyda zarbaga uchraganini, so‘ng qulayotganda uning qanotlaridan biri daraxtga urilganini bildirgan. Halokat natijasida samolyot yonib ketgan hamda bortdagi ayrim portlovchi qurilmalar portlagan.

 

Voqea joyidan uzoqroqda joylashgan hudud aholisi birinchi bo‘lib voqea joyiga yetib kelib, tirik qolganlarni qutqarib chiqargan. Videolarda erkaklar yarador askarlarni mototsikllar ortiga ortib, tuproq yo‘llar bo‘ylab tezda olib ketayotgani aks etgan.

 

Keyinchalik harbiy texnika yetib kelgan. Lekin halokat joyiga yetib borish qiyinligi qutqaruv ishlarini sekinlashtirgan. Lopezning aytishicha, omon qolganlarning 57 nafari shifoxonaga yotqizilgan, ulardan 30 nafari harbiy klinikada davolanmoqda.

 

Kolumbiya prezidenti Gustavo Petro o‘z lavozimi yakunlanish arafasida harbiy tizimni modernizatsiya qilish rejalari byurokratik to‘siqlar sabab kechikayotganini tanqid qildi.

 

“Endi kechikishlarga yo‘l qo‘ymayman. Gap yoshlarimiz hayoti haqida ketmoqda. Agar fuqarolik yoki harbiy ma’muriy xodimlar bu vazifani bajara olmasa, ular lavozimidan olinadi”, — dedi u X ijtimoiy tarmog‘ida.

 

Lockheed Martin vakili kompaniya hodisa yuzasidan olib borilayotgan tergovda Kolumbiyaga yordam berishga tayyorligini bildirdi.