Mojtabo Xomanaiy AQSh bilan muzokaralarga rozi bo‘ldi
Abbos Aroqchi yadroviy dastur va ballistik raketalarni saqlab qolgan holda, Rossiyaga boyitilgan uran eksportini muhokama qilishga tayyorligini bildirdi.
Eron tashqi ishlar vaziri Abbos Aroqchining ma’lum qilishicha, Mojtabo Xomanaiy Vashington bilan bevosita muzokaralarni ma’qullagan. Bu haqda Isroilning Ynet nashri xabar berdi.
Telefon orqali bo‘lgan suhbat davomida Aroqchi urushni tezda tugatishga tayyorligini bildirgan, ammo bu faqat Tehron tomonidan belgilangan shartlar bajarilganda amalga oshadi. Shu bilan birga, Eron yadroviy dasturi va ballistik raketalardan butunlay voz kechishga tayyor emas, lekin Rossiyaga boyitilgan uran eksportini muhokama qilishga tayyorligini ma’lum qilgan.
23-mart kuni Donald Tramp Vashington va Tehron o‘rtasidagi muzokaralarni “juda samarali” deb baholagan. U Pentagonga Eronning elektr stansiyalari va energetika infratuzilmasiga zarbalarni besh kunga kechiktirishni buyurgan edi. Bu vaqt ichida muzokaralar davom ettiriladi.
Axios xabariga ko‘ra, Turkiya, Misr va Pokiston Vashington va Tehron o‘rtasidagi muzokaralarda vositachilik qilmoqda. Ushbu uch davlat ikki kun davomida alohida muzokaralar olib borib, tomonlarga xabar almashishda yordam berishgan.
