Prezident Yangi Toshkentda quriladigan musiqali favvora loyihasi bilan tanishdi
Majmuada 232 metr balandlikka suv otadigan super favvora va 360 darajali suv ekrani barpo etiladi.
Prezident Shavkat Mirziyoyev Yangi Toshkent shahrida barpo etiladigan zamonaviy musiqali favvora majmuasi loyihasi bilan tanishdi.
Majmua Yangi Toshkentda qariyb 8 gektar maydonni egallaydi va unda suv, musiqa va yorug‘lik uyg‘unligidagi shoularni o‘tkazish imkoniyatiga ega favvora barpo etiladi. Loyiha doirasida 232 metr balandlikka suv otadigan super favvora, 100 metr diametrli suzuvchi platforma va 360 darajali suv ekranini hosil qiladigan favvora qurilishi ko‘zda tutilgan. Suv havzasi atrofida yashil hududlar, xizmat ko‘rsatish obyektlari va vizual effektlar bilan jihozlangan maskan barpo etiladi.
Davlat rahbari loyihaning texnik yechimlari, hududni kompleks obodonlashtirish va tashrif buyuruvchilar uchun savdo-ovqatlanish hamda servis xizmatlarini sifatli tashkil etish masalalariga alohida e’tibor qaratdi. Shu bilan birga, Mustaqillik bayrami tadbirlari yuqori saviyada o‘tkazilishi ta’kidlandi.
Mazkur majmua Yangi Toshkentning diqqatga sazovor maskanlaridan biriga aylanishi va shaharning me’moriy qiyofasini boyitishi kutilmoqda.
