Shimoliy Koreyaning yadroviy maqomi o‘zgarmaydi — Kim Chen In

Shimoliy Koreya yetakchisi Kim Chen In mamlakat yadroviy kuchlarini doimiy ravishda mustahkamlashini va Janubiy Koreyani birinchi raqamli dushman davlat sifatida ko‘rishini ma’lum qildi. Bu haqda davlat axborot agentligi KCNA'ga tayanib Reuters xabar berdi.

 

Qayd etilishicha, parlamentdagi nutqida Kim Pxenyaning yadroviy davlat maqomi “o‘zgarmas” ekanini ta’kidlab, “o‘zini himoya qiluvchi yadroviy tiyib turish kuchini” kengaytirish milliy xavfsizlik, mintaqaviy barqarorlik va iqtisodiy rivojlanish uchun zarur ekanini bildirdi.

 

U yadroviy qurolsizlanishni iqtisodiy imtiyozlar yoki xavfsizlik kafolatlariga almashtirish g‘oyasini rad etdi. Kim Chen Inning so‘zlariga ko‘ra, Shimoliy Koreya yadroviy kuchlarni saqlab qolgan holda rivojlanishni davom ettirish to‘g‘ri strategik tanlov ekanini allaqachon isbotlagan.

 

“Suveren davlatlarning sha’ni va huquqlari bir tomonlama kuch va zo‘ravonlik bilan buzilayotgan bugungi dunyo sharoiti davlat mavjudligi va tinchligining haqiqiy kafolati nima ekanini aniq ko‘rsatmoqda”, — dedi Kim Oliy xalq majlisidagi nutqida.

 

Uning ta’kidlashicha, yadroviy qurollar urushning oldini olishga xizmat qilgan va davlatga iqtisodiy o‘sish, qurilish hamda aholi turmush darajasini yaxshilashga resurs ajratish imkonini bergan.

 

Janubiy koreyalik tahlilchilar Kim Chen Inning gaplarini AQShning Eronga qilgan harbiy hujumlarini bilvosita tanqid qilish deb baholagan. Yang Moo-jinning aytishicha, bu holat Pxenyaning yadroviy qurollarni tashqi aralashuvni to‘xtatish va rejim xavfsizligini ta’minlash vositasi sifatida ko‘rish haqidagi pozitsiyasini yana bir bor mustahkamlagan.

 

Kim, shuningdek, AQSh va uning ittifoqchilarini Koreya yarimoroliga yaqin hududlarda strategik yadroviy vositalarni joylashtirib, mintaqani beqarorlashtirishda aybladi. Shu bilan birga, Shimoliy Koreya endi o‘zini tahdid ostidagi davlat deb hisoblamasligini va zarurat tug‘ilganda boshqalarga ham tahdid solish imkoniyatiga ega ekanini bildirdi.

 

Kim Janubiy Koreya “birinchi raqamli dushman davlat” sifatida tan olinganini ma’lum qilib, agar Seul Shimoliy Koreya suverenitetiga tajovuz qilsa, “kechiktirmasdan qat’iy javob” berilishidan ogohlantirdi.

 

Reuters ga ko‘ra, bu bayonot Pxenyaning so‘nggi yillarda Seulga nisbatan keskin pozitsiya egallaganini yana bir bor ko‘rsatadi. Avvalroq Kim Koreya yarimorolining tinch yo‘l bilan birlashuvi siyosatidan voz kechib, ikki davlatni o‘zaro dushman sifatida qayta belgilagan edi.

 

Lim Eul-chulning ta’kidlashicha, bu ritorika Janubiy Koreyani “qardosh davlat” sifatidagi maqomdan butunlay mahrum etib, uning legitimligini ham inkor etishga qaratilgan.

 

Janubiy Koreya prezidenti qarorgohi — Moviy uy esa Kimning bayonotlarini “tinch hamkorligiga zid” deb baholab, yarimorolda xavfsizlik va farovonlik faqat muloqot va hamkorlik orqali ta’minlanishini ta’kidladi.