Surxondaryoda chegara qo‘shinlariga ishga joylashtirishni va’da qilgan soxta “prokuror” qo‘lga olindi
U fuqarodan 1000 dollar talab qilgan va pulni olayotgan paytda qo‘lga olingan.
Surxondaryo viloyatida o‘zini davlat xizmatchisi sifatida tanishtirib, fuqaroni aldash orqali pul olishga uringan shaxs qo‘lga olindi. Bu haqda Bosh prokuratura matbuot xizmati xabar berdi.
Tergov ma’lumotlariga ko‘ra, fuqaro o‘zini Bosh prokuratura departamenti xodimi sifatida tanishtirib, go‘yoki Davlat xavfsizlik xizmati Chegara qo‘shinlaridagi mansabdor shaxslar bilan aloqasi borligini bildirgan. U murojaatchiga shartnoma asosida harbiy xizmatga joylashtirib berishni va’da qilib, buning evaziga 1000 AQSh dollari miqdorida pul talab qilgan.
21-mart kuni o‘tkazilgan tezkor tadbir davomida ushbu shaxs kelishilgan pul mablag‘larini olayotgan vaqtida ashyoviy dalillar bilan qo‘lga olingan. O‘sha paytda u 12,2 million so‘m miqdoridagi pulni qabul qilgan.
Mazkur holat yuzasidan gumonlanuvchiga nisbatan Jinoyat kodeksining 168-moddas hamda 211-moddasi bo‘yicha jinoiy ish qo‘zg‘atildi.
Tergov jarayonida ushbu shaxs hech qachon biror davlat idorasida, jumladan Bosh prokuratura departamentida ham ishlamaganligi aniqlangan.
Bosh prokuratura fuqarolarni o‘zini davlat xizmatchisi sifatida tanishtirib, ishga joylashtirish yoki boshqa xizmatlar uchun pul talab qiladigan shaxslarga ishonmaslikka hamda bunday holatlar yuzaga kelganda tegishli huquqni muhofaza qiluvchi organlarga murojaat qilishga chaqirdi.
