Toshkentda Milliy dendrologiya bog‘i barpo etiladi

Shavkat Mirziyoyev 23-mart kuni ekologiya va atrof-muhitni muhofaza qilish sohasida 2026–2030-yillarga mo‘ljallangan ustuvor loyihalar taqdimoti bilan tanishdi. Unda Toshkent shahrida Milliy dendrologiya bog‘ini barpo etish rejasi taqdim etildi.

 

Loyihaga ko‘ra, poytaxtda 108 gektar maydonda yirik yashil hudud tashkil etiladi. Unda 50 ming tup daraxt ko‘chati va 100 ming tup butalar ekilishi rejalashtirilgan.

 

Yashil hududlar kengaytiriladi

 

Taqdimotda “Yashil makon” dasturi doirasida botanika va dendrologiya bog‘larini tashkil etish konsepsiyasi ham ko‘rib chiqildi. Hozirda mamlakatda 3 ta botanika bog‘i mavjud bo‘lib, qo‘shimcha ravishda yana 12 ta botanika va 16 ta dendrologiya bog‘ini barpo etish rejalashtirilgan.

 

2028-yilgacha Qoraqalpog‘iston Respublikasi va barcha viloyatlarda kamida 100 gektar maydonda shunday bog‘lar tashkil etiladi. Bu orqali 2030-yilgacha mamlakatda yashillik darajasini 14,2 foizdan 30 foizga oshirish, havodagi PM2.5 va PM10 ko‘rsatkichlarini 20–25 foizga kamaytirish rejalashtirilgan.

 

Milliy dendrologiya bog‘ining imkoniyatlari

 

Toshkentda barpo etiladigan Milliy dendrologiya bog‘i faqat dam olish hududi emas, balki ilmiy va ma’rifiy markaz sifatida ham xizmat qiladi. U yerda:

 

• “Dunyo daraxtlari” hududi;

 

• 6 ta iqlim mintaqasiga xos o‘simliklar kolleksiyasi;

 

• meva va mahalliy daraxtzorlar;

 

• dorivor o‘simliklar bog‘i;

 

• oranjereya va gulzorlar;

 

• piyodalar va velosiped yo‘laklari;

 

• dam olish zonalari tashkil etiladi.

 

Shuningdek, bog‘ markazida 1 gektarli sun’iy ko‘l barpo etilib, uning atrofida sakura bog‘i yaratiladi.

 

Zamonaviy ekologik texnologiyalar

 

Loyihada quyosh panellari, qayta ishlangan materiallardan tayyorlangan infratuzilma elementlari hamda avtomatlashtirilgan tomchilatib sug‘orish tizimi joriy etilishi ko‘zda tutilgan.

 

Bog‘ Green University uchun tabiiy laboratoriya, aholi uchun esa ekoturizm va ekota’lim markaziga aylanishi kutilmoqda.