Yangi Toshkentda FIFA talablariga mos 55 ming o‘rinli zamonaviy stadion qurilmoqda
Qiymati 100 million dollarlik yangi stadionda 2027-yilgi U-20 jahon chempionati o‘yinlari oʻtkaziladi.
Shavkat Mirziyoyev 24-mart kuni Yangi Toshkent hududida barpo etilayotgan yirik sport inshooti — zamonaviy futbol stadionining qurilish jarayoni bilan tanishdi.
Mazkur sport majmuasiga 2025-yil 11-noyabr kuni davlat rahbari tomonidan tamal toshi qo‘yilgan edi. Hozirda stadion qurilishi jadal sur’atlarda olib borilmoqda.
Jumladan, hududni tekislash ishlari to‘liq yakunlangan, poydevor quyish jarayonlari esa qariyb 95 foizga bajarilgan. Qurilish maydoniga metall konstruksiyalar bosqichma-bosqich yetkazib berilmoqda.
So‘nggi yillarda mamlakatda futbol infratuzilmasini rivojlantirish bo‘yicha keng ko‘lamli ishlar amalga oshirilmoqda. Xususan, mahalliy chempionatlar tizimi isloh qilinib, bolalar va o‘smirlar futbol akademiyalari tashkil etildi. Hozirda hududlarda 75 ta katta va 302 ta mini stadion faoliyat yuritmoqda.
2017-yilda mamlakatda FIFA hamda Osiyo futbol konfederatsiyasi talablariga javob beradigan stadionlar soni atigi 3 ta bo‘lgan bo‘lsa, bugungi kunda ularning soni 10 tadan oshdi. Bundan tashqari, 1,5 mingdan ortiq maktab stadionlari ta’mirlanib, 1 milliondan ziyod o‘quvchi va mahalla yoshlari sport bilan shug‘ullanish imkoniyatiga ega bo‘ldi.
Ushbu sa’y-harakatlar natijasida mamlakat futbolida sezilarli yutuqlar kuzatilmoqda. Jumladan, O‘zbekiston olimpiya terma jamoasi ilk bor Parij Olimpiadasi 2024 musobaqalarida ishtirok etdi. Shuningdek, milliy terma jamoa tarixda ilk bor joriy yilda bo‘lib o‘tadigan FIFA Jahon chempionati yo‘llanmasini qo‘lga kiritdi.
2024-yil 2-oktabr kuni FIFA Kengashi yig‘ilishida 20 yoshgacha bo‘lganlar o‘rtasidagi 2027-yilgi jahon chempionatini Oʻzbekiston va Ozarbayjonda o‘tkazish to‘g‘risida qaror qabul qilingan edi.
Aynan shu musobaqa talablariga mos ravishda barpo etilayotgan Yangi Toshkent stadioni mamlakat futboli uchun muhim loyiha hisoblanadi. Qiymati qariyb 100 million dollar bo‘lgan ushbu inshoot Osiyodagi eng zamonaviy futbol majmualaridan biriga aylanishi kutilmoqda.
55 ming tomoshabinga mo‘ljallangan stadion 6 qavatdan iborat bo‘ladi. Unda sportchilar, muxlislar va matbuot vakillari uchun keng imkoniyatlar yaratiladi. Tomoshabinlar uchun tezkor kirish-chiqishni ta’minlash maqsadida o‘ndan ortiq eskalator o‘rnatilishi rejalashtirilgan.
Majmua hududida yana 3 ta qo‘shimcha mashg‘ulot maydoni quriladi. Stadion yaqinida metro bekati hamda 5 ming 500 o‘rinli avtoturargoh barpo etilishi ko‘zda tutilgan.
Davlat rahbari bunday katta sig‘imli yopiq stadion mamlakatda ilk bor barpo etilayotganini ta’kidlab, qurilishda har bir jihatga alohida e’tibor qaratish zarurligini qayd etdi. Shuningdek, stadion atrofini obodonlashtirish ishlari oldindan rejalashtirilib, bosqichma-bosqich amalga oshirilishi lozimligi ta’kidlandi.
