Yaqin Sharqdagi 23 kunlik mojaro davomida 2100 dan ortiq bola halok bo‘ldi yoki jarohat oldi — BMT
Pentagonning ma’lumotiga ko‘ra, AQSh Erondagi 9000 nishonga zarba bergan.
Birlashgan Millatlar Tashkilotining Bolalar jamg‘armasi direktori o‘rinbosari Ted Chaybanning ma’lum qilishicha, Yaqin Sharqda 23 kundan beri davom etayotgan mojaro natijasida kamida 2100 bola halok bo‘lgan yoki jarohat olgan. Shu davr mobaynida Eronda 206, Livanda 118 bola vafot etgan, Isroilda to‘rtta va Quvaytda esa bitta bola halok bo‘lgan.
Chaybanning ta’kidlashicha, urush boshlanganidan beri har kuni o‘rtacha 87 bola jarohat olgan yoki o‘ldirilgan. “Mintaqadagi bolalar mojaroning dahshatli ta’sirini boshdan kechirmoqda. Agar janglar davom etsa, qurbonlar va yaradorlar soni ortishi mumkin”, dedi u.
BMT ma’lumotlariga ko‘ra, jangovar harakatlar natijasida bolalar farovonligi uchun muhim bo‘lgan uylar, maktablar, kasalxonalar va boshqa infratuzilma vayron bo‘lgan yoki jiddiy shikastlangan.
Pentagon tomonidan berilgan ma’lumotlarga ko‘ra, AQSh Erondagi 9000 ta nishonga zarba bergan va Eronning 140 ta kemasiga zarar yetkazgan yoki ularni vayron qilganini da’vo qilmoqda. Avvalroq, Donald Tramp 9-aprelni Eronga qarshi harbiy operatsiyaning tugash sanasi sifatida belgilashni rejalashtirayotgani xabar qilingan edi.
Shu bilan birga, Benyamin Netanyaxu bilvosita Eron bilan kelishuvni tasdiqladi, ammo Isroil bir kun oldin Tehron va Urmiyadagi hududlarni bombardimon qilgan. Zarba turar-joy hududlariga tushgan, Eron harbiylari esa o‘z suverenitetini himoya qilish choralarini ko‘rmoqda.
Joriy mojaro 28-fevral kuni AQSh va Isroil tomonidan Erondagi nishonlarga zarba berish bilan boshlangan. Eron esa bunga javoban Isroil hududi va Yaqin Sharqdagi AQSh harbiy obyektlariga javob zarbalarini berdi.
