2030 yilgacha havo ifloslanishi keskin kamaytiriladi
“Toza havo” loyihasi doirasida atmosferani muhofaza qilish bo‘yicha choralar kuchaytirilmoqda.
O‘zbekistonda “Toza havo” umumxalq loyihasi doirasida atmosfera havosining ifloslanishini kamaytirishga qaratilgan qator vazifalar amalga oshirilmoqda.
Ma’lumotlarga ko‘ra, bugungi kunda poytaxt hamda Navoiy, Farg‘ona, Chirchiq va Termiz shaharlarida havo ifloslanish darajasining belgilangan me’yorlardan oshishiga bir qator omillar sabab bo‘lmoqda. Ular orasida sanoatning jadal rivojlanishi, uglerod yoqilg‘ilaridan keng foydalanish, transport vositalari sonining ortishi, tabiiy omillar va nazoratning yetarli emasligi qayd etilgan.
Shu munosabat bilan 2030 yilga qadar atmosferaga chiqarilayotgan ifloslantiruvchi moddalar hajmini qisqartirish, sanoat korxonalarida zararli tashlamalarni ushlab qolish darajasini oshirish, transportdan chiqadigan chiqindilarni kamaytirish hamda PM2,5 ko‘rsatkichlari bo‘yicha me’yor oshgan kunlar sonini qisqartirish muhim vazifalar sifatida belgilangan.
Loyiha doirasida, ayniqsa, energetika va sanoat tarmoqlariga alohida e’tibor qaratilmoqda. Shu bilan birga, qurilish sohasida ham ekologik talablar kuchaytirilmoqda.
Endilikda yirik qurilish obyektlarini loyihalashtirishda ko‘kalamzorlashtirish darajasini oshirish, qurilish materiallarini yopiq sharoitda saqlash, chiqindilarni maxsus quvurlar va konteynerlar orqali olib chiqish, hududlarni himoya to‘siqlari bilan o‘rash hamda onlayn kuzatuv kameralarini o‘rnatish kabi majburiy talablar joriy etilmoqda.
Ta’kidlanishicha, mazkur chora-tadbirlar nafaqat ekologik barqarorlikni ta’minlash, balki atmosfera havosi tozaligini yaxshilash, aholi salomatligini muhofaza qilish hamda shahar infratuzilmasining uyg‘un rivojlanishiga xizmat qiladi.
