AQSh Eronga Yaqin Sharqdagi urushni tugatish bo‘yicha 15 banddan iborat reja yubordi

Amerika Qo‘shma Shtatlari Eronga Yaqin Sharqdagi urushni tugatish uchun 15 bandli reja yuborgan. Bu haqda The New York Times manbalarga tayanib xabar bermoqda.

 

Qayd etilishicha, reja Tramp ma’muriyatining urushdan chiqish yo‘lini topishga bo‘lgan intilishini aks ettiradi, chunki urushning iqtisodiy oqibatlari sezilmoqda.

 

Rasmiylar reja Pokiston orqali yetkazilganini va Pokiston Bosh shtab raisi Munir AQSh va Eron o‘rtasida asosiy vositachi sifatida faoliyat yuritayotganini bildirgan. 

 

Nashrga ko‘ra, Misr va Turkiya Eronni konstruktiv munosabatga chaqirgan. Munirning Eronning Islom inqilobi qo‘riqlari korpusi bilan yaqin aloqalari mavjud bo‘lib, u taraflar o‘rtasida xabarlarni yetkazishda vositachi vazifasini bajaradi.

 

Rejaning mazmuni Eronning ballistik raketa va yadroviy dasturlarini nazarda tutadi. Isroil va AQSh 28-fevraldan boshlangan bombardimon kampaniyasi davomida Eronning raketalari, ularni uchirish qurilmalari va ishlab chiqarish inshootlari hamda yadroviy dasturini nishonga olgan. Amerika va Isroil rahbarlari Eronning yadroviy qurolga ega bo‘lishiga yo‘l qo‘ymaslikka va’da bergan.

 

Reja dengiz yo‘llarini ham qamrab oladi. Chunki urush boshidan beri Eron deyarli barcha G‘arb kemalarining Ho‘rmuz bo‘g‘ozidan xavfsiz o‘tishiga to‘sqinlik qilmoqda. Bu strategik suv yo‘li orqali Jahon bozoriga neft va tabiiy gaz yetkazib berish qisqargan va narxlar oshgan.

 

Biroq The Telgraph'ning manbalarga tayanib xabar berishicha, Eron tomoni fevral oyida bo‘lib o‘tgan muzokaralardan so‘ng Tehron nishonga olingani sababli Uitkoff va Kushner bilan yuzma-yuz muzokara o‘tkazishni istamayapti.

 

Shuningdek, agar haftaning oxirida Pokistonda yangi muzokaralar boshlansa, bosh muzokarachisi sifatida AQSh vitse- prezidenti Jey Di Vens ko‘rilmoqda.

 

Manbalarning bildirishicha, Eron ham Vense bilan ishlashni afzal ko‘rmoqda, chunki u va’dasiga sodiq qoladi deb hisoblanmoqda.