Endilikda O‘zbekiston aholisi favqulodda vaziyatlar haqida masjidlar orqali ogohlantiriladi
Bugungi kunga qadar yettita viloyatdagi 272 ta masjidda aholini favqulodda vaziyatlardan ogohlanitirish uchun maxsusu uskunalar o‘rnatilgan.
Birlashgan Millatlar Tashkiloti Taraqqiyot Dasturi (BMTTD) Favqulodda vaziyatlar vazirligi (FVV) bilan hamkorlikda O‘zbekiston aholisini tabiiy ofatlar va favqulodda vaziyatlarda tezkor ogohlantirish imkonini beruvchi innovatsion texnik yechimni joriy etdi.
Loyiha doirasida aholi punktlariga yaqin joylashgan masjidlarga maxsus uskunalar o‘rnatildi. Endilikda FVVning favqulodda xabarlari masjidlarning tashqi ovoz kuchaytirgichlari orqali tarqatiladi va axborot tezkor ravishda keng jamoatchilikka yetkaziladi.
Ma’lum qilinishicha, bugungi kunga qadar Jizzax, Qashqadaryo, Namangan, Samarqand, Sirdaryo, Toshkent va Farg‘ona viloyatlaridagi 272 ta masjidda ushbu uskunalar o‘rnatilgan.
Masjidlar mahalliy aholi orasida nufuzli ijtimoiy institut sifatida e’tiborga molik va deyarli barcha aholi punktlarida joylashgan bo‘lib, binodagi yuqori quvvatli tashqi ovoz kuchaytirgichlar yordamida ogohlantirish 500 metrdan 2 kilometrgacha eshitilish radiusini ta’minlaydi.
Loyiha hisob-kitoblariga ko‘ra, bu orqali taxminan 6,5 million nafar aholi, jumladan ayollar, erkaklar, bolalar va zaif qatlamlar qamrab olinadi.
Ushbu tizim bilan mobil aloqa yoki elektr ta’minotida uzilishlar yuzaga kelganda ham tezkor xabarlarni uzatish mumkin.
Shuningdek, BMTTD va Yashil iqlim jamg‘armasi moliyaviy ko‘magida aholini ogohlantirish maqsadida mamlakatdagi asosiy avtomobil yo‘llari bo‘ylab va gavjum joylarda 28 ta tashqi keng formatli ekran ham o‘rnatildi.
BMTTD, FVV va O‘zgidrometning “O‘zbekiston aholisining iqlim o‘zgarishi natijasida yuzaga keladigan xavf-xatarlarga nisbatan chidamliligini oshirishga qaratilgan kompleks erta ogohlantirish tizimini takomillashtirish” nomli qo‘shma loyihasi Yashil iqlim jamg‘armasi tomonidan moliyalashtiriladi.
Loyiha ayniqsa suv toshqinlari, sellar, ko‘chkilar, qor ko‘chkilari va gidrologik qurg‘oqchilik kabi tabiiy ofatlar xavfi yuqori bo‘lgan tog‘li hududlarda aholini erta ogohlantirish tizimini modernizatsiya qilish va takomillashtirishga qaratilgan.
