Eron AQShning muzokaralar takliflarini hiyla deb baholamoqda
AQSh va vositachi davlatlar Eron bilan ehtimoliy muzokaralarni Pokiston poytaxti Islomobodda o‘tkazish imkoniyatini muhokama qilmoqda.
Eron rasmiylari AQSh prezidenti Donald Tramp tomonidan ilgari surilgan tinchlik muzokaralari takliflarini samimiy emas, balki siyosiy hiyla sifatida baholamoqda. Bu haqda Axios nashri muzokaralar jarayonidan xabardor manbaga tayanib xabar berdi.
Manbaga ko‘ra, Eron rasmiylari Pokiston, Misr va Turkiyaga — Qo‘shma Shtatlar bilan ehtimoliy muzokaralarda vositachilik qilayotgan davlatlarga — Vashingtonning takliflariga ishonch yo‘qligini bildirgan. Tehron vakillari Tramp ma’muriyati ilgari ham ikki marotaba ularni “aldaganini” ta’kidlab, yana shunday holat takrorlanishidan xavotirda ekanliklarini ma’lum qilgan.
Eron tomonining fikricha, mintaqada AQSh harbiy kuchlarining ko‘paytirilishi hamda Yaqin Sharqqa qo‘shimcha harbiy kontingent yuborish haqidagi qarorlar muzokaralar takliflarining samimiyligiga shubha uyg‘otmoqda. Shu sababli Tehron Vashingtonning diplomatik tashabbuslarini ehtiyotkorlik bilan baholamoqda.
Nashr ma’lumotiga ko‘ra, AQSh va vositachi davlatlar Eron bilan ehtimoliy muzokaralarni 26-mart kuni Pokiston poytaxti Islamabad shahrida o‘tkazish imkoniyatini muhokama qilmoqda. Biroq hozircha bu borada Tehrondan yakuniy javob olinmagan.
Axios qayd etishicha, avvalgi muzokaralar jarayonida ham AQSh yetakchilari diplomatik kelishuvga erishish istagini bildirgan bo‘lsa-da, bir vaqtning o‘zida harbiy bosim siyosatini ham davom ettirgan. Masalan, o‘tgan yil iyun oyida Isroil tomonidan Eronga qarshi amalga oshirilgan zarbalar yadroviy muzokaralarning navbatdagi bosqichi boshlanishidan bir necha kun avval sodir bo‘lgan.
Shuningdek, fevral oyi oxirida Eron va AQSh Jeneva shahrida muzokaralarni davom ettirishga kelishgan edi. Biroq oradan ko‘p o‘tmay AQSh va Isroilning Eron hududidagi nishonlarga hujumlari qayd etilgan.
Oq uy vakillari esa Vashington muzokaralarga jiddiy yondashayotganini ta’kidlab, ehtimoliy uchrashuvda AQSh vitse-prezidenti J. D. Vens ishtirok etishi mumkinligini bildirgan. Manbalarga ko‘ra, AQSh prezidenti maxsus vakili Steve Witkoff eronliklar tomonidan nisbatan murosali siyosatchi sifatida qabul qilinadigan shaxs sifatida Vens nomzodini ilgari surgan.
