G‘azoda 18 oylik bola Isroil harbiylari tomonidan qiynoqqa solindi
Tibbiy tekshiruvlar bolaning oyog‘iga sigaret bosilganini va metall buyum bilan jarohat yetkazilganini ko‘rsatgan.
G‘azoda 18 oylik falastinlik bola otasining hibsga olinishi vaqtida Isroil kuchlari tomonidan qiynoqqa solingan. Bu haqda Al Jazeera xabar berdi.
Tibbiy tekshiruvlar bolaning oyog‘iga sigaret bosilgani va metall buyum bilan jarohat yetkazilgani haqida ma’lumot berdi.
Xabarlarga ko‘ra, Isroil askarlari Usama Abu Nassar ismli erkakni hibsga olgan va so‘roq jarayonida uning farzandini ko‘z o‘ngida qiynoqqa solgan. Bolaning onasi harbiylar Karim ismli o‘g‘lining oyog‘iga sigaret bosib o‘chirgani va metall buyum sanchganini bildirgan.
Bola taxminan 10 soatdan so‘ng ozod etilib, Qizil Xoch jamiyati orqali Mag‘ozi hududida oilasiga topshirilgan. Bolaning otasi hibsda qolmoqda.
Isroil harbiylari ayblovlarni rad etib, voqea 19 mart kuni “Sariq chiziq” hududida sodir bo‘lganini bildirgan. Ularning ta’kidlashicha, uch yoshli bolaning otasi bo‘lgan shaxs harbiylar ogohlantirishiga qaramay harakat qilgan va ular yo‘l chetiga ogohlantiruvchi o‘q uzgan.
Harbiylar bayonotida, bolaning jarohat olishi ehtimol otishma oqibatida sachragan parchalar bilan bog‘liqligi aytilgan. Shuningdek, bola so‘roq jarayonida tibbiy ko‘rikdan o‘tkazilib, oziq-ovqat va suv bilan ta’minlangan, so‘ngra Qizil Xoch jamiyati vakillariga topshirilgan.
Isroil harbiylari hibsga olingan shaxs o‘zini HAMAS a’zosi sifatida tanishtirib, 7-oktyabr voqealari vaqtida Isroil hududiga kirganini tan olganidan so‘ng hibsga olinganini bildirgan.
