Germaniyadagi yahudiylar mamlakat prezidentining Eron urushi bo‘yicha pozitsiyasini tanqid qildi
Ular mazkur urush eronliklarga terror va zulmning tugashiga umid berishini aytgan.
Germaniyadagi Yahudiylar markaziy kengashi mamlakat prezidenti Frank-Valter Shtaynmayerni “AQSh va Isroilning Eronga qarshi urushi xalqaro huquqni buzadi va bu siyosiy jihatdan halokatli xato” degan bayonoti uchun tanqid qildi.
“Kimki oyatulloh rejimiga qarshi urushni osongina ‘xalqaro huquq buzilishi’ deb atasa, tarixni inkor etadi”, — dedi kengash raisi Yozef Shuster DPA agentligiga bergan intervyusida.
Shusterning ta’kidlashicha, 1979-yildan buyon Isroilni yo‘q qilish Eron davlat doktrinasining bir qismi hisoblanadi. Shuster shuningdek, Eronga qarshi urush eronliklar uchun 47 yil davom etgan terror va zulm tugashiga umid berishini aytgan.
U qo‘shimcha qilib, Germaniya siyosatchilaridan Eron rejimidan aziyat chekayotganlarga nisbatan hamdardlik izhor qilivchi bayonotlar eshitishni istashini bildirgan.
Avvalroq Berlinda Germaniya Tashqi ishlar vazirligining 75 yilligiga bag‘ishlangan tadbirda Shtaynmayer Eronga qarshi bo‘yicha harbiy harakatni tanqid qilib, uni “xalqaro huquqqa zid” va “oldini olish mumkin bo‘lgan” deb atagan edi.
Shu bilan birga Eron Tashqi ishlar vaziri Abbos Aroqchi Germaniya prezidentini “eronliklarga qarshi huquqbuzarliklarni qoralagani uchun e’tirofga loyiq” deb baholagan.
