“Islom sivilizatsiyasiga zamonaviy qarashni shakllantiradigan makon”
O‘zbekistonda ochilgan Islom sivilizatsiyasi markazi xalqaro e’tiborni qozondi.
O‘zbekistonda ochilgan Islom sivilizatsiyasi markazi xalqaro ommaviy axborot vositalari diqqat markaziga aylandi.
Qayd etilishicha, jahonning yetakchi nashrlari — CNN, Forbes, The Wall Street Journal, The Economist, Arab News va China Daily — loyihani “global miqyosdagi megaloyiha” va “Markaziy Osiyoning muhim madaniy markazi”, “Markaziy Osiyo durdonasi” hamda “islom sivilizatsiyasiga zamonaviy qarashni shakllantiradigan makon” sifatida baholamoqda.
Markaz haqidagi materiallar 20 dan ortiq davlatda va 7 tilda — ingliz, arab, ispan, xitoy, hind, turk va rus tillarida chop etildi. Ushbu xabarlar xalqaro jurnalistlar va ekspertlar tomonidan tayyorlangan bo‘lib, loyihaga nisbatan keng auditoriyaning qiziqishini aks ettiradi.
Xalqaro nashrlar markazning zamonaviy ilmiy yondashuvlar va texnologiyalar bilan boyitilganligiga e’tibor qaratmoqda. Arab News Markazning ochilishi muqaddas Ramazon oyiga to‘g‘ri kelganini ta’kidlasa, Khaleej Times uni “noyob va zamonaviy makon” sifatida baholaydi. Forbes esa loyihani O‘zbekistonning iqtisodiy va madaniy rivojlanish strategiyasi doirasida amalga oshirilgani bilan bog‘laydi.
The Wall Street Journal va China Daily Markazning boy asrab-avaylash va xalqaro hamkorlikda madaniy-gumanitar almashinuvga qo‘shgan hissasiga e’tibor qaratmoqda. The Korea Times va Euronews Markazni ilmiy tadqiqotlar, ta’lim va ko‘rgazma faoliyatini birlashtirgan “zamonaviy tadqiqot va meros xabi” sifatida baholashgan.
Shuningdek, Yevropa va Osiyo nashrlari markazning arxitekturasi va barqarorlik standartlari, shuningdek tarixiy va madaniy merosni saqlashdagi o‘rnini qayd etmoqda. Caliber.az esa uni “Ginnes rekordlar kitobiga nomzod” sifatida ko‘rsatgan.
Islom sivilizatsiyasi markazi nafaqat muzey sifatida, balki mamlakatning madaniy va tarixi merosini keng auditoriyaga taqdim etuvchi makon sifatida ham ahamiyatli ekanligi ta’kidlanmoqda. Markaz nafaqat turistik diqqatni jalb qilishda, balki madaniy va ilmiy hamkorlikni rivojlantirishda ham muhim ahamiyatga ega.
