Italiyalik milliarder Ho‘rmuz bo‘g‘ozi yopilishi fonida katta boylik orttirdi
Ekspertlar milliarderning strategiyasini bozorni egallab olish va narxlarni oshirishga urinish sifatida baholamoqda.
Italiyalik milliarder Janluiji Aponte, boyligi 44,5 milliard dollarga baholanadigan MSC konteyner tashish kompaniyasi hammuassisi, vositachi kompaniyalar orqali o‘nlab supertankerlarni sotib olib, yirik flot shakllantirgani ma’lum bo‘ldi.
Forbes nashri xabariga ko‘ra, neft narxlarining ko‘tarilishi va Hormuz bo‘g‘ozining blokadasi bilan bog‘liq vaziyat tufayli Aponte yuk tashish bozorini monopollashtirishi mumkin.
Qayd etilishicha, Aponte Janubiy Koreyaning Sinokor Merchant Marine kompaniyasi orqali amalga oshirilgan bitimlar ortida turadi. Ushbu kompaniya dekabr oyidan boshlab xom neft tashish uchun mo‘ljallangan juda katta tankerlar (VLCC)ni faol ravishda sotib olishni boshlagan. Mart oyiga kelib kamida 60 ta kema 3,3 milliard dollarga xarid qilingan.
Ma’lumotlarga ko‘ra, xarid qilingan 31 ta tanker Haut Brion nomi ostidagi kompaniyalarda ro‘yxatdan o‘tkazilgan bo‘lib, ularning 11 tasiga milliarderning amakivachchasi Mario Aponte rahbarlik qiladi. Yana 20 ta tanker Liberiyada ro‘yxatdan o‘tkazilgan va ularning egalari yashirilgan.
Agar ushbu aktivlar MSC bilan bog‘liq ekani tasdiqlansa, Aponte dekabrdan buyon sotib olingan kemalarning yarmidan ko‘pini nazorat qilayotgani aniq bo‘ladi.
Forbes ma’lumotiga ko‘ra, Eron mojarosi va Hormuz bo‘g‘ozi bilan bog‘liq vaziyat sabab yuk tashish stavkalari rekord darajaga yetgan. Shu fonda Sinokor va MSC umumiy qiymati 6,7 milliard dollarga teng kamida 76 ta supertankerni nazorat qilmoqda.
Okeanis Eco Tankers ma’lumotlariga ko‘ra, ular global tanker flotining 17 foizigacha, spot bozordagi flotning esa 39 foizigacha qismini nazorat qilmoqda.
Forbes nashriga bergan intervyusida ekspertlar milliarderning strategiyasini bozorni egallab olish va bozor narxlarini oshirishga urinish sifatida baholadilar.
