Prezident Shavkat Mirziyoyev neft-gaz tarmog‘idagi ishlar bo‘yicha hisobot bilan tanishdi
“O‘zbekneftgaz” tizimida yangi quduqlar ishga tushirilgani, mavjudlarini ta’mirlash va texnologik tadbirlar amalga oshirilgani ma’lum qilindi.
Shavkat Mirziyoyevga neft-gaz tarmog‘ida qazib chiqarish hajmini barqarorlashtirish va yangi zaxiralarni o‘zlashtirish bo‘yicha chora-tadbirlar ijrosi yuzasidan axborot berildi.
“O‘zbekneftgaz” tizimida tabiiy gaz qazib chiqarish dinamikasi, mavjud pasayish omillari va ularni bartaraf etish choralari haqida ma’lumot taqdim etildi. Joriy yilning birinchi choragida yangi quduqlar ishga tushirilib, mavjudlarini ta’mirlash va texnologik tadbirlar amalga oshirilgani qayd etildi. Yil davomida bu ishlar yanada kengaytirilishi rejalashtirilgan.
Quduqlar samaradorligini oshirish uchun zamonaviy texnologiyalarni joriy etish masalasiga alohida e’tibor qaratildi. Hozirda yangi 2D va 3D seysmik tadqiqotlar uchun istiqbolli maydonlar aniqlanmoqda. Burg‘ilash va dala ishlari ustidan xalqaro standartlar asosida nazoratni kuchaytirish, geologik-gidrodinamik modellashtirish va qazib chiqarish dasturlarini puxta shakllantirish bo‘yicha chora-tadbirlar belgilangan.
Shuningdek, konlarda gaz qazib olish koeffitsientini oshirish, qiyin o‘zlashtiriladigan zaxiralarga yangi yondashuvlarni tatbiq etish, 2026–2027-yillarga mo‘ljallangan dasturlarning iqtisodiy samaradorligini baholash masalalari muhokama qilindi. Bu borada xalqaro kompaniyalar bilan hamkorlikda ishlar olib borilayotgani qayd etildi.
Davlat rahbari tarmoqda ishlab chiqarish barqarorligini ta’minlash, mavjud quvvatlardan samarali foydalanish, geologiya-qidiruv va burg‘ilash ishlarini tizimli tashkil etish, shuningdek, xorijiy hamkorlar bilan amaliy natija beradigan sheriklikni kengaytirish muhimligini ta’kidladi.
Mutasaddilarga belgilangan rejalar ijrosini qattiq nazoratga olish va har bir yo‘nalish bo‘yicha aniq natijadorlikni ta’minlash yuzasidan topshiriqlar berildi.
