Rossiya Ukrainaga 24 soat ichida rekord darajadagi dron hujumi uyushtirdi

Rossiya Ukrainaga qarshi urush boshlanganidan buyon eng yirik havo hujumlaridan birini amalga oshirib, 24 soat ichida mamlakat bo‘ylab jami 948 ta dron uchirdi. Bu haqda BBC Ukraina Harbiy-havo kuchlariga tayanib xabar bermoqda.

 

Qayd etilishicha, seshanba kuni ertalabdan boshlab 556 ta dron uchirilgan bo‘lib, kunduzgi keng ko‘lamli hujum kam uchraydigan holat hisoblanadi. Hujumlar oqibatida kamida uch kishi halok bo‘lgan, o‘nlab fuqarolar jarohatlangan.

 

G‘arbiy Lvov shahrida joylashgan, YuNESKO merosi ro‘yxatiga kiritilgan XVI asrga oid Bernardin monastiri zarar ko‘rdi. Hududiy rasmiylar ma’lumotiga ko‘ra, aynan shu hududda yuz bergan hujum oqibatida 32 kishi jarohatlangan.

 

Qo‘shni Ivano-Frankivsk  hududida tug‘ruqxona zarbaga uchragan. Viloyat markazida ikki kishi halok bo‘lgan, yana to‘rt kishi, jumladan bir bola jarohatlangan.

 

Ternopil shahrida ham bir nechta to‘g‘ridan-to‘g‘ri zarbalar qayd etilgan, biroq qurbonlar haqida ma’lumot berilmagan. Markaziy Vinnytsia shahrida esa bir kishi halok bo‘lib, 13 kishi jarohat olgan.

 

Bundan avvalgi tungi hujumlarda Rossiya Ukrainaga 392 ta dron va 34 ta raketa yo‘llagan, natijada besh kishi halok bo‘lgan.

 

Ukraina prezidenti Volodimir Zelenskiy o‘z videomurojaatida hujumlar ko‘lami “Rossiya urushni tugatish niyatida emasligini ko‘rsatmoqda”, deya ta’kidladi.

 

Ukraina Harbiy-havo kuchlari zarbalarning katta qismi qaytarilganini bildirgan bo‘lsa-da, mamlakatning turli hududlarida to‘g‘ridan-to‘g‘ri zarbalar qayd etilgan.

 

Shu kuni Rossiyaning Kursk region viloyatida ham Ukraina dron hujumi sodir bo‘lib, bir kishi halok bo‘lgani va 13 kishi jarohatlangani ma’lum qilindi.

 

2022-yil fevralidan beri davom etayotgan urush fonida jangovar harakatlar davom etmoqda. AQSH vositachiligida olib borilgan tinchlik muzokaralari esa so‘nggi geosiyosiy keskinliklar sabab to‘xtab qolgan.