Toshkent viloyatida bir oiladan uch kishi is gazidan zaharlanib vafot etdi
Uyda 79 yoshli ayol, uning 37 yoshli nevarasi va 17 yoshli bola bo‘lgan.
Toshkent viloyatining O‘rta Chirchiq tumanida bir oilaning uch a’zosi is gazidan zaharlanib hayotdan ko‘z yumdi. Bu haqda Bosh prokuratura matbuot kotibi Hayot Shamsutdinov ma’lum qildi.
Ma’lumotlarga ko‘ra, uyda 79 yoshli ayol, uning 37 yoshli nevarasi va 17 yoshli bola bo‘lgan. O‘rta Chirchiq tumanlararo sud-tibbiy ekspertizasining ma’lumotnomasiga asosan, ularga is gazidan o‘tkir zaharlanish tashxisi qo‘yilgan.
Guvohlar ular ushbu mahallaga yaqinda, taxminan, uch kun avval ko‘chib kelgani bildirgan. Voqeadan xabar topgan qo‘shnilar darhol yordamga shoshgan . Mahalla faollari bu hududda ilgari bunday holat kuzatilmaganini ta’kidlagan.
Voqea sodir bo‘lgan xonadon va uning texnik holati tegishli organlar tomonidan o‘rganilmoqda. Holat yuzasidan tuman prokuraturasi tomonidan tergovga qadar tekshiruv harakatlari olib borilmoqda.
