Toshkent viloyatida chiqindi xizmatlari tariflari 1-apreldan oshiriladi
Qarorda bir nafar fuqaro uchun oyiga chiqindi to‘lovi 10 864 so‘m etib belgilanishi taklif etilgan.
Toshkent viloyatida 2026-yil 1-apreldan maishiy chiqindilarni olib chiqish xizmatlari uchun to‘lov tariflari oshiriladi. Tegishli qaror Xalq deputatlari viloyat kengashi tomonidan qabul qilindi.
Qarorga ko‘ra, hozirda bir nafar fuqaro uchun oyiga 7 840 so‘m (QQS bilan) bo‘lgan chiqindi to‘lovi 10 864 so‘m etib belgilanishi taklif etilgan. Yuridik shaxslar uchun esa tarif 82 880 so‘mdan 97 316 so‘mga oshiriladi.
Shuningdek, 1 tonna qattiq maishiy chiqindini olib chiqish va uni qayta yuklash stansiyasi yoki poligonlarga yetkazib berish uchun sanitariya-tozalash korxonalariga to‘lanadigan haq 482 842,08 so‘mni (QQS bilan) tashkil etadi. 1 kub metr chiqindi uchun esa ushbu xizmat narxi 215 250,56 so‘m (QQS bilan) etib belgilangan.
Ma'lumot o'rnida, 2026-yil 1-yanvardan boshlab chiqindilarni olib ketish xizmatlari uchun to‘lovning yangi tizimi joriy etilgan. Unga ko‘ra, iste’molchilardan faqat amalda ko‘rsatilgan xizmatlar uchun haq olinadi va barcha hisob-kitoblar onlayn tizimlar orqali amalga oshiriladi.
