Toshkentda AQSH vizasini olib berish uchun 75 ming dollar olgan shaxs ushlandi
Shuningdek, Bolgariyaga ishga yuborish uchun 3 ming dollar talab qilgan shaxs ham qo‘lga olingan.
Bosh prokuratura huzuridagi Departament va boshqa huquqni muhofaza qiluvchi organlar hamkorligida olib borilgan tezkor tadbirlar natijasida xorijiy davlatlarga ishga yuborish bilan bog‘liq bir qator firibgarlik holatlari fosh etildi.
Ma’lum qilinishicha, Sergeli tumanida olib borilgan tadbirda Sh.A. fuqaro M.O.dan AQSHga “Biznes” vizasini rasmiylashtirish uchun 75 000 AQSH dollarini olgan vaqtida ushlangan. Ushbu holatda ashyoviy dalillar ham topilgan.
Shuningdek, Xatirchi tumanida olib borilgan tezkor tadbirda “T.L.” MCHJ rahbari F.Sh. fuqaro J.B.ning ishonchiga kirib, uni Bolgariyaga yuborish va ishga joylashtirish evaziga 3 000 AQSH dollarini firibgarlik yo‘li bilan olgan vaqtda ushlangan.
Mazkur holatlar yuzasidan O‘zbekiston Jinoyat kodeksining 168-moddasi (firibgarlik) va 28 hamda 211-moddalari (pora berish) bo‘yicha jinoyat ishlari qo‘zg‘atildi va tergov harakatlari olib borilmoqda.
