AQSh tez orada Eronda quruqlik amaliyotini boshlaydi — The Wall Street Journal
AQSh Eron yaqiniga qo‘shimcha minglab dengiz piyodalari va desantchilarini yubormoqda.
Amerikaning yaqin orada Eron hududida quruqlik amaliyoti o‘tkazishi rejalashtirilmoqda. Bu haqda The Wall Street jurnalisti AQSh Senati ichidagi uchta manbaga tayanib ma’lum qilgan.
“Kamida uch nafar respublikachi kongressmen, jumladan Vakillar palatasi va Senat Qurolli kuchlari rahbarlari, Eron hududida quruqlik amaliyoti rejalashtirilayotgani va bu yaqin kelajakda boshlanishi mumkinligini qat’iy bildirdi”, — deb yozdi jurnalist.
So‘nggi kunlarda AQSh Eron yaqinidagi hududga qo‘shimcha minglab dengiz piyoda va desant askarlarni yuborib, quruqlik kuchlarini jamlamoqda.
Ma’lumotlarga ko‘ra, ushbu hafta minglab dengiz piyodalari bilan harbiy kema AQShning Markaziy qo‘mondonligi nazorati ostiga o‘tadi. Bu qo‘mondonlik AQSh kuchlarini Yaqin Sharqda boshqaradi.
Shuningdek, Pentagon tezkor harakat qiladigan desantchilarni tayyorlashni boshladi. Ushbu kuchlar, oldinroq “Epik G‘azab” operatsiyasi doirasida bu hududga yuborilgan 50 000 nafar harbiy xizmatchiga qo‘shilishi mumkin.
Hozirda AQShning quruqlik amaliyoti haqidagi bayonotlari ortidan Tehron Eronning asosiy neft markazi bo‘lgan Xarg orolini mudofaa qilishni kuchaytirmoqda. Ushbu orol avval AQSh tomonidan hujumga uchragan edi.
