Bangladeshda avtobus daryoga qulashi oqibatida 20 dan ortiq kishi halok bo‘ldi
Avtobusda taxminan 40 nafar yo‘lovchi bo‘lgan.
Bangladeshda yo‘lovchi avtobusi Padma daryosiga qulashi oqibatida kamida 24 kishi halok bo‘ldi. Bu haqda Reuters agentligi mahalliy rasmiylarga tayanib xabar berdi.
Ma’lumotlarga ko‘ra, avtobus mamlakat markaziy hududlaridan birida paromga chiqish uchun pontonda kutayotgan paytda nazoratdan chiqib ketib, daryoga qulab tushgan.
Dastlabki ma’lumotlarga ko‘ra, transport vositasida taxminan 40 nafar yo‘lovchi bo‘lgan.
Qutqaruvchilar hodisadan bir necha soat o‘tib avtobusni daryo tubidan chiqarib olishga muvaffaq bo‘lishgan.
Qidiruv-qutqaruv ishlari yong‘in xavfsizligi xizmati, armiya, politsiya, qirg‘oq qo‘riqlash xizmati hamda mahalliy ma’muriyat hamkorligida olib borilmoqda. Operatsiyada 10 nafar g‘avvos ishtirok etayotgan to‘rtta maxsus bo‘linma jalb qilingan.
Rasmiylarga ko‘ra, halok bo‘lgan 24 kishidan 23 nafarining shaxsi aniqlangan. Qurbonlar orasida ayollar va bolalar ham borligi ma’lum qilingan.
