“G‘oliblarga Damas va pul mukofotlari beriladi”

Maktabgacha va maktab ta’limi vazirligi tomonidan qator hamkor tashkilotlar bilan birgalikda umumta’lim maktablarining 7-11-sinf o‘quvchi-qizlari o‘rtasida futbol bo‘yicha “Maktabgacha va maktab ta’limi vaziri kubogi” musobaqasi o‘tkazilmoqda. 

 

 

Qayd etilishicha, bundan ko‘zlangan asosiy maqsad, o‘quvchi-qizlar o‘rtasida ommaviy futbolni rivojlantirish, sog‘lom turmush tarzini mustahkamlash hamda iqtidorli sportchilarni aniqlashdan iborat.

 

Ma’lumot o‘rnida: musobaqaning tuman (shahar) bosqichida O‘zbekiston bo‘ylab 5 020 ta umumta’lim maktabidan jami 98 618 nafar o‘quvchi-qiz ishtirok etdi. Umumiy natijalarga ko‘ra, o‘z hududlarida yetakchilikni qo‘lga kiritgan 16 ta jamoa respublika bosqichiga yo‘llanmani qo‘lga kiritishdi.

 

 

Ayni damda musobaqaning Respublika bosqichi Surxondaryo viloyatida bo‘lib o‘tmoqda. Unda 14 ta hududdan jami 256 nafar o‘quvchi-qiz o‘zaro kuch sinashmoqda. 

 

Jarayonlar doirasida ishtirokchi o‘quvchi qizlar Surxondaryo viloyatining tarixiy binolariga uyushtiriladigan sayohat tadbirlarida ham qatnashishdi.

 

Futbol bahslarining dastlabki saralash bosqichi 25-28-mart kunlari viloyatning Angor tumani markaziy stadionida 4 ta guruhga bo‘lingan holda o‘tkazilmoqda.

 

Final bahsi va taqdirlash marosimi 29-mart kuni Surxon arena stadionida tashkil qilinadi.

 

 

“Maktabgacha va maktab ta’limi vaziri kubogi” musobaqasi respublika bosqichida:

 

1-o‘rinni qo‘lga kiritgan g‘olib jamoa a’zolari — “Damas” avtomashinasi va 250 mln so‘m;

 

2-o‘rinni qo‘lga kiritgan jamoa a’zolari — “Damas” avtomashinasi va 200 mln so‘m;

 

3-o‘rinni qo‘lga kiritgan jamoa a’zolari — “Damas” avtomashinasi va 150 mln so‘m pul mukofotlari bilan taqdirlanadi.

 

Shuningdek, 13 ta jamoa ishtirokchilariga Sport vazirligi tomonidan vorkaut maydonchasini qurib berish bo‘yicha vaucher, Davlat xavfsizlik xizmati va O‘zbekiston futbol asotsiatsiyasi tomonidan 800 mln so‘m qiymatga ega futbol koptoklari taqdim etiladi.