Nikolas Maduro ustidan sud jarayoni boshlandi
Agar u aybdor deb topilsa, kamida 20 yilga ozodlikdan mahrum qilinishi mumkin.
26‑mart kuni Qo‘shma Shtatlarda Venesuelaning sobiq prezidenti Nikolas Maduro ustidan sud jarayoni boshlandi. U va uning rafiqasi Silia Flores Nyu‑York federal sudida narkoterrorizm bo‘yicha ayblovlarga duch kelmoqda. Bu haqda Reuters xabar berdi.
Sud jarayoni 2006‑yilda qabul qilingan va kamdan‑kam hollarda qo‘llanadigan narkoterrorizm to‘g‘risidagi qonun doirasida ko‘rilmoqda. Agar prokurorlar Maduroni aybdor deb topa olsa, u kamida 20 yilga ozodlikdan mahrum qilish jazosi bilan jazolanishi mumkin.
Sudda prokurorlar Maduro va boshqa ayblanuvchi rasmiylar giyohvand moddalar savdosi orqali terroristik faoliyatni moliyalashtirish bilan bog‘liq jinoyatlar sodir etganini isbotlashga harakat qilmoqda. Ular, xususan, Kolumbiya inqilobiy qurollikuchlari (FARC) kabi terrorchi deb topilgan guruhlar bilan hamkorlikda kokain tashish bo‘yicha fitna uyushtirishda ishtirok etganlikda gumon qilinmoqda.
Maduro va Flores sud oldida ayblovlarni qat’iyan inkor etib, AQShning bu da’volarini siyosiy motivga asoslangan “imperialistik fitna” deb atamoqda. Prokurorlar uchun muhim vazifa — giyohvand moddalar savdosi jinoyatlarini terrorizm bilan bog‘lashni sud oldida ishonchli asoslashdir.
Eslatib o‘tamiz, Nikolas Maduro 3‑yanvar kuni Karakasda maxsus operatsiya davomida AQSh maxsus kuchlari tomonidan qo‘lga olingan va keyinchalik AQShga olib ketilgan edi.
