O‘zbekistonda banklardan 500 dollargacha valyutani pasportsiz sotib olishga ruxsat berilishi mumkin
Markaziy Bank loyihani jamoatchilik muhokamasiga qo‘ydi.
O‘zbekiston Markaziy banki tomonidan e’lon qilingan normativ-huquqiy hujjat loyihasiga ko‘ra, tijorat banklarida naqd chet el valyutasini sotib olish tartibiga o‘zgartirishlar kiritilishi taklif etilmoqda.
Loyihada jismoniy shaxslarga 500 AQSH dollarigacha bo‘lgan naqd valyutani bankka pasport taqdim etmasdan sotib olishga ruxsat berilishi mumkinligi nazarda tutilgan. Amaldagi tartibga ko‘ra, ushbu limit 100 AQSH dollarini tashkil etadi.
Hujjatga ko‘ra, tijorat banklari ekvivalenti 500 AQSH dollaridan oshgan miqdorda chet el valyutasini sotib olayotgan jismoniy shaxslarni lozim darajada tekshirishini yo‘lga qo‘yish taklif etilmoqda.
Bundan tashqari, mijozni lozim darajada tekshirish talablari qo‘llaniladigan holatlarga ham o‘zgartirish kiritish nazarda tutilgan. Amaldagi qoidalarga ko‘ra, bazaviy hisoblash miqdorining 500 baravariga teng yoki undan oshgan summada bank hisobvarag‘ini ochmasdan yoki undan foydalanmasdan operatsiyalar amalga oshirilganda mijozning shaxsiga aniqlik kiritilishi kerak. Muhokamaga qo‘yilgan loyihada ushbu chegarani 175 mln so‘m miqdorida belgilash taklif etilgan.
Mazkur loyiha yuzasidan jamoatchilik muhokamasi joriy yil 4-aprelga qadar davom etadi.
