O‘zbekistonda nikohni bekor qilishda yarashish muddati uzaytirilishi mumkin
Er-xotinlarga nikohni qayta ko‘rib chiqish uchun bir yil muddat berish taklif qilinmoqda.
Oila kodeksiga o‘zgartirish va qo‘shimchalar kiritish to‘g‘risidagi qonun loyihasi e’lon qilindi. Hujjatga ko‘ra, sud orqali nikohni bekor qilmoqchi bo‘lgan er-xotinlarga yarashish muddati amaldagi olti oy o‘rniga bir yilgacha uzaytirilishi taklif qilinmoqda.
Loyihani Oila va xotin-qizlar qo‘mitasi ilgari surdi. Hujjatda ta’kidlanishicha, amaldagi qonunchilikda oila munosabatlarining muhim jihatlari to‘liq qamrab olinmagan. Xususan, FHDYo orqali ajralish jarayonida oiladagi haqiqiy vaziyat, nizolarning kelib chiqish sabablari va ularni hal etish imkoniyatlari yetarlicha hisobga olinmaydi. Natijada, nikohning bekor qilinishi ko‘pincha faqat rasmiy tartibga aylanadi. Shu munosabat bilan sud tomonidan er-xotinga yarashish uchun beriladigan muddat ko‘pincha yetarli emas.
Shu sababli, Oila kodeksining 40-moddasiga o‘zgartirish kiritilib, “olti oyga” degan ibora o‘rniga “bir yilgacha” degan jumla kiritilishi taklif qilinmoqda. Bu er-xotinlarga nikohni qayta ko‘rib chiqish va oilaviy nizolarni hal qilish uchun ko‘proq vaqt beradi.
Loyihada sud va boshqa organlar tomonidan bolalar bilan bog‘liq masalalarda quyidagi o‘zgartirishlar kiritilishi ko‘zda tutilgan:
Voya yetmagan bolalar nikoh bekor bo‘lganidan so‘ng ota-onasin7ng qaysi biri bilan yashashini sud belgilaydi, shu jumladan ularning turar joyini ta’minlash tartibi ham aniqlanadi.
Sud bolaning alohida yashayotgan ota-onasi bilan muloqot qilish tartibini belgilash imkoniyatiga ega bo‘ladi.
Bolalar uchun undirilgan alimentlar bolaning nomiga ochilgan bank hisobiga o‘tkaziladi, mablag‘larning to‘plami va sarflanishi vasiylik va homiylik organlari tomonidan nazorat qilinadi.
Nikoh muddati bir yildan kam bo‘lgan oilalarda ajralish holatida bolalarga ta’minot berish majburiyati kiritiladi. (Zo‘ravonlik bilan bog‘liq holatlar bundan mustasno.)
Shuningdek, sud va tegishli hokimiyat organlariga xabardor qilish tartibi yangilanadi: “uch kundan kechiktirmay” degan jumla o‘rniga elektron hukumat tizimi orqali xabardor qilish amalga oshiriladi.
