Pentagon Eronga qarshi “hal qiluvchi zarba” ssenariylarini ishlab chiqmoqda

Pentagon Eronga qarshi ehtimoliy harbiy operatsiyalar bo‘yicha bir nechta ssenariylarni ko‘rib chiqmoqda. Bu haqda Axios nashri AQSh rasmiy manbalariga tayanib xabar berdi.

 

Nashr ma’lumotlariga ko‘ra, ishlab chiqilayotgan variantlar qatorida quruqlikdagi qo‘shinlardan foydalanish, keng ko‘lamli bombardimon hamda Fors ko‘rfazidagi strategik hududlarni nazoratga olish kabi choralar mavjud.

 

Manbalarning ta’kidlashicha, ayrim AQSh rasmiylari bunday kuch namoyishi tinchlik muzokaralarida Vashingtonning pozitsiyasini mustahkamlashi yoki Donald Tramp uchun siyosiy jihatdan “g‘alaba” e’lon qilish imkonini berishi mumkin, deb hisoblamoqda.

 

Xususan, AQSh tomonidan ko‘rib chiqilayotgan ehtimoliy harbiy ssenariylar orasida quyidagilar bor:

 

Eronning asosiy neft eksport markazlaridan biri bo‘lgan Xarg oroliga bostirib kirish yoki uni blokadaga olish;

 

Larak orolini egallash orqali Eronning Hormuz bo‘g‘ozi ustidan nazoratini cheklash;

 

Strategik ahamiyatga ega Abu Musa oroli hamda bo‘g‘oz yaqinidagi yana ikki kichik orolni nazoratga olish;

 

Hormuz bo‘g‘ozining sharqiy qismida Eron neftini tashiyotgan kemalarni toʻsib qoʻyish yoki musodara etish.

 

Bundan tashqari, AQSh harbiylari Eron hududiga chuqur kirishni nazarda tutuvchi quruqlikdagi operatsiya rejalarini ham tayyorlagani aytilmoqda. Biroq yuqori xavf sababli Oq uy hozircha yakuniy qaror qabul qilmagan.

 

Xabar qilinishicha, yaqinda AQSh Harbiy-havo kuchlarining C-17A Globemaster III transport samolyoti BAA hududi ustida harbiy manevrlar o‘tkazgan. Ayrim tahlilchilar buni ehtimoliy operatsiyaga tayyorgarlik sifatida baholamoqda.

 

Eslatib o‘tamiz, AQSh va Isroil 28-fevraldan buyon Eronga qarshi harbiy operatsiyalar olib bormoqda. Mojaro kuchayishi natijasida global energetika bozori uchun muhim bo‘lgan Hormuz bo‘g‘ozi orqali yuk tashish deyarli to‘xtab qolgan.

 

Manbalarga ko‘ra, agar Tehron bilan muzokaralar ijobiy natija bermasa, AQSh rahbariyati vaziyatni keskinlashtirish ehtimolini ham istisno qilmayapti.