Qoraqalpog‘istonda aliment to‘lashdan qochib yurgan erkak avtobusdan topildi

Qoraqalpog‘iston Respublikasining Beruniy tumanida aliment to‘lashdan qochib yurgan erkak avtobusdan topildi. Bu haqida MIB axborot xizmati Zamon.uz’ga ma’lum qildi.

 

Qayd etilishicha, Majburiy ijro byurosi Beruniy tuman bo‘limi ish yurituvida mavjud bo‘lgan, Fuqarolik ishlari bo‘yicha Beruniy tumanlararo sudning ijro hujjatiga asosan undiruvchi J.Ch. foydasiga tarbiyasidagi ikki nafar farzandlari ta’minoti uchun qarzdor A.Yo.dan aliment undirish belgilangan. 

 

Qarzdor tomonidan aliment pullari har oy o‘z vaqtida to‘lab kelinmaganligi sababli, ijro hujjati ijrosini ta’minlash maqsadida, qarzdorning yashash manziliga bir necha marotaba borilganida, qarzdor ushbu manzilda yo‘qligi aniqlangan. 

 

Shu sababli unga nisbatan Majburiy ijro byurosi Beruniy tuman bo‘limi davlat ijrochisi tomonidan qidiruv e’lon qilingan. 

 

Majburiy ijro byurosi Qoraqalpog‘iston Respublikasi boshqarmasi qidiruv shu’basi xodimlari tomonidan qarzdor To‘rtko‘l tumanida ikkinchi turmush o‘rtog‘ining uyida yashirinib, Beruniy tumaniga kelib ketib yurganligi aniqlanib, qarzdorni ushlash rejasi tuzilgan.

 

Joriy yilning 25-mart kuni qarzdor To‘rtko‘l tumanidan To‘rtko‘l-Beruniy yo‘nalishida qatnovchi avtobusga chiqqan va avtobus tezkor xodimlar tomonidan kuzatib borilgan. 

 

Avtobus tuzilgan reja asosida Beruniy tuman markazida joylashgan bekatda to‘xtagan paytda qarzdor byuroning Beruniy tuman xodimlari bilan birgalikda qo‘lga olingan.

 

Hozirda qarzdorning aliment to‘lovlaridan qarzdorligi 28 mln so‘mni tashkil etib, uning javobgarlik masalasi ko‘rib chiqilmoqda.