Rossiyada elektron sigaretlar butunlay taqiqlanishi mumkin
Davlat komissiyasi elektron nikotin yetkazib berish tizimlarini to‘liq taqiqlash tashabbusini qo‘llab-quvvatladi.
Rossiyada elektron sigaretalar, veyplar hamda ular uchun mo‘ljallangan suyuqliklarni ishlab chiqarish, import qilish va tarqatishni to‘liq taqiqlash tashabbusi ilgari surildi. Bu haqda Vedomosti nashri xabar berdi.
Ma’lum qilinishicha, ushbu taklif sanoat mahsulotlarining noqonuniy aylanishiga qarshi kurash bo‘yicha davlat komissiyasi yig‘ilishida qo‘llab-quvvatlangan.
Yig‘ilish yakunlari bo‘yicha mazkur masala yuzasidan alohida qonun loyihasi ishlab chiqilishi mumkin.
Nashr manbalariga ko‘ra, davlat komissiyasi tomonidan ma’qullangan tashabbuslar odatda keyinchalik qonunchilik darajasida rivojlantiriladi va tegishli hujjatlar shakllantiriladi.
Dastlab yig‘ilishda elektron nikotin yetkazib berish tizimlari bozorida nazoratni kuchaytirish masalasi muhokama qilinishi rejalashtirilgan edi. Biroq muhokamalar davomida ishtirokchilar ushbu mahsulotlarni butunlay taqiqlash zarurligi haqida yakdil fikrga kelishgan.
Cheklovlar tatbiq etiladigan qurilmalar ro‘yxati hamda qonun loyihasini ishlab chiquvchi tashkilot keyinchalik aniqlashtirilishi ma’lum qilindi.
